Rei Ben-Hadad kä Siria yekänti ye käkwe bä kabre rü ganinkä Israel rüere. Akwa käre ni Ngöbö kukwei niekä Eliseo nämene rei Israel ye mike mokre ne kwe rabadre ngitie. Aisete rei Ben-Hadad ja töi mikani Eliseo kain ngite. Eliseo nämene kä Dotán yekänti o ñakare ye ngwanintari kwe aune biti nitre rükä kwe ye juani kwe Eliseo kain ngite.

Nitre rükä sirio ye namani kä Dotán yekänti deu. Dekä, ni Eliseo dimikaka ye nikani jubäre aune juta ye bäre ta nitre rükä nämene kwati krubäte ye jutuabare ie. Kä jürä namani krubätebätä aune niebare ja dibiti kwe: ‘Eliseo, ¿nibike dre nuainne?’. Eliseo niebare ie: ‘Nitre rükä tä bäri kwati nibe niaratre ye ngwä’. Ngutuä nämene juta bäre ta yekänti mädä aune karo ñukwäre rükäre kwati krubäte nämene ye Jehovakwe mikani tuare ni Eliseo dimikaka yei.

Nitre rükä sirio jababare Eliseo kain ngite ye ngwane, niara orabare: ‘Jehová, mä raba kä mike drüne niaratre okwäte’. Nitre rükä yei kä nämene tuin akwa batibe nämenentre medente ye ñaka namani gare ietre. Angwane Eliseo niebare ietre: ‘Munta nianinte juta bäre. Mun jakwre ti jiebiti, munta nire känene yekänti tibike niken mun ngwena’.  Niaratre nikani Eliseo jiebiti nememe Samaria. Yete rei Israel nämene nüne.

Metrere nitre sirio nämene medente ye nükani gare ietre, akwa ñaka namani gitiadre kräketre. Rei Israel ye käkwe ngwantaribare Eliseo ie: ‘¿Tikwe niaratre murie keta ya?’. Nitre sirio tö namani kukwe tare nuain Eliseobätä, ¿yebätä niarakwe nitre ye mikani ja ngie nuin? Ñakare. Eliseo niebare rei ie: ‘Ñaka niaratre murie keta. Ñakare aune buke aune tuenmetre nikenta’. Aisete rei mrö sribebare ere krubäte niaratre kräke aune ye bitikäre niaratre tuanimetre kwe nikenta ja gwirete.