Npeehada uas yog cov neeg Alas tus vajntxwv pheej tuaj ua rog rau cov Yixayee tsis tseg. Tiamsis txhua zaus Elisa, uas yog tus cev Vajtswv lus, twb ceeb toom cov Yixayee tus vajntxwv ua ntej lawm, vajntxwv thiaj dim. Yog li ntawd, Npeehada thiaj li xav mus ntes Elisa. Thaum nws hnov tias Elisa nyob hauv lub moos Dautha, nws txawm txib ib pab tub rog mus ntes Elisa.

Thaum yav tsaus ntuj cov Alas tuaj txog lub moos Dautha. Thaum kaj ntug, Elisa tus tub qhe pom ib pab tub rog coob kawg li tuaj vij nkaus lub moos. Nws ntshai heev, nws thiaj qw tias: ‘Elisa, zaum no wb yuav ua li cas?’ Elisa teb tias: ‘Txhob ntshai, cov uas tuaj wb tog coob dua cov uas tuaj lawv tog.’ Tamsim ntawd Yehauvas cia Elisa tus tub qhe pom muaj nees thiab tsheb hluavtaws ua rog nyob puag ncig tej roob.

Thaum Alas cov tub rog yuav ntes Elisa, nws thov Yehauvas tias: ‘Thov koj ua kom lawv dig muag.’ Tamsim ntawd, lawv cia li yoob tag thiab tsis paub xyov lawv nyob qhovtwg lawm. Elisa hais rau lawv tias:  ‘Nej tuaj yuam kev rau lub moos no lawm. Caum kuv qab, kuv mam coj nej mus nrhiav tus neeg uas nej xav tau.’ Lawv caum Elisa qab mus txog ntua lub nroog Xamali uas cov Yixayee tus vajntxwv nyob.

Thaum cov Alas mus txog, lawv mam paub tias lawv nyob qhovtwg ces twb lig dhau lawm. Cov Yixayee tus vajntxwv nug Elisa tias: ‘Koj puas xav kom kuv muab lawv tua kiag?’ Elisa puas yuav ua pauj rau cov Alas? Elisa tsis ua pauj, nws tseem hais tias: ‘Tsis txhob muab lawv tua. Muab mov rau lawv noj thiab tso lawv rov mus.’ Yog li ntawd, Yixayee tus vajntxwv thiaj ua ib rooj mov loj rau lawv noj tag ces lawv rov mus lawm.