Rei di Síria, ki éra Ben-adadi, kontínua ta ataka Israel. Má tudu bês, proféta Elizeu ta avizaba rei di Israel, asi el ta skapaba. Nton, Ben-adadi disidi bai pega Elizeu. El diskubri ma Elizeu staba na sidadi di Dotan i el manda se trópas pa bai pega-l.

Trópas di Síria bai pa Dotan di noti. Na kel otu dia di palmanhan, ajudanti di Elizeu sai na rua i el odja sidadi serkadu ku un monti trópa. El fika xeiu di medu i el grita: ‘Elizeu kuzê ki nu ta faze?’ Elizeu fla-l: ‘Kes ki sta ku nos é más txeu di ki kes ki sta ku es.’ Kel óra, Jeová poi ajudanti di Elizeu ta odja kel monti ki ta serkaba sidadi xeiu di kabalus i karus di géra ku lumi.

Kantu trópas di Síria tenta pega Elizeu, el ora: ‘Jeová, favor pô-s fika ségu.’ Nbóra inda es sta ta odjaba, dirapenti es fika es ka sabe undi ki es staba. Elizeu fla kes trópa: ‘Kel sidadi ki nhos sta ta djobe é ka kel-li. Nhos bai djuntu ku mi N ta bai  mostra nhos kel ómi ki nhos sta ta djobe.’ Es bai djuntu ku Elizeu ti Samaria, ki éra lugar ki rei di Israel ta moraba.

Dipôs, kes trópa da kónta na undi ki es staba. Rei di Israel pergunta Elizeu: ‘Pa N mata-s?’ Bu atxa ma Elizeu ta apruveitaba kel xansi li pa vinga di kes algen ki tenta faze-l mal? Nau. Elizeu fla: ‘Ka bu mata-s. Da-s kumida i manda-s pa otu kaminhu.’ Nton, rei faze-s un fésta grandi i dipôs el manda-s pa kaza.