Li awabʼej Ben-Hadad re li tenamit Siria naabʼal sut kixyal yalok saʼ xbʼeenebʼ laj Israel. Abʼan, li propeet Eliseo junelik kixkʼe resil re li awabʼej re Israel re naq t-eleliq. Joʼkan naq, laj Ben-Hadad kixkʼoxla xchapbʼal ut xkʼambʼal laj Eliseo. Kixtzʼil rix naq wank chaq Dotan ut kixtaqlahebʼ laj puubʼ re Siria chi xchapbʼal.

Ebʼ laj puubʼ keʼwulak Dotan chiru qʼoqyink. Wulajaq eqʼla, laj tenqʼahom re laj Eliseo kiʼelk ut kiril naq sutsu li tenamit xbʼaanebʼ laj puubʼ. Kʼajoʼ naq kixuwak ut kixjap re: «Eliseo, kʼaru tqabʼaanu?». Laj Eliseo kixye re: «Naabʼalebʼ laj puubʼ chiqu chiruhebʼ aʼan». Saʼ li hoonal aʼan, li Jehobʼa kixbʼaanu naq laj tenqʼahom re laj Eliseo tril naq li tzuul nujenaq chi kawaay ut chi bʼelebʼaal chʼiichʼ re xaml.

Naq ebʼ laj puubʼ keʼxyal xchapbʼal, laj Eliseo kixye saʼ li xtij: «At Jehobʼa, bʼaanu usilal, mutzʼobʼresihebʼ». Ut ebʼ laj puubʼ inkʼaʼ chik nekeʼxnaw bʼar wankebʼ usta yookebʼ chi ilok. Tojaʼ naq laj Eliseo kixye rehebʼ: «Xexsachk, moko aʼin ta li tenamit. Taqehomaqin, ut texinkʼam  rikʼin li winq li nekeesikʼ». Keʼxtaqe laj Eliseo toj Samaria. Aran wank chaq li awabʼej re Israel.

Tojaʼ naq, xeʼril bʼar tzʼaqal wankebʼ, abʼan maakʼaʼ chik nekeʼruuk xbʼaanunkil. Li awabʼej re Israel kixpatzʼ re laj Eliseo: «Ma tinkamsihebʼ?». Qajultikaq naq ebʼ laj puubʼ ak keʼxyal xrahobʼtesinkil laj Eliseo abʼan, ma tixkʼe raj reqaj rehebʼ? Inkʼaʼ. Laj Eliseo kixye re li awabʼej: «Maakamsihebʼ. Kʼehebʼ xwa ut kanabʼebʼ chi xik». Li awabʼej kixkʼubʼ jun nimla waʼak, tojaʼ naq kixkanabʼebʼ chi xik.