Bene-adadi, ntotila ya Siria, landaka kunwanisa Izraele. Kansi konso ntangu, profete Elisha kebisaka ntotila ya Izraele, yo yina yandi tinaka. Bene-adadi bakaka lukanu ya kukanga Elisha na ngolo. Bo songaka yandi nde Elisha vandaka na mbanza Dotani, mpi yandi tindaka basoda ya Siria kuna sambu na kukanga yandi.

Bantu ya Siria kumaka na Dotani na mpimpa. Na suka ya kilumbu yina landaka, nsadi ya Elisha basikaka na nganda mpi monaka nde basoda mingi kibeni me ziunga mbanza. Yandi waka boma mpi tubaka na ndinga ya ngolo nde: ‘Elisha, beto fwete sala nki?’ Elisha songaka yandi nde: “Bantu yina kele ti beto kele mingi kuluta bantu yina kele ti bo.” Na ntangu yina, Yehowa sadisaka nsadi ya Elisha na kumona nde bangumba yonso ya nziunga ya mbanza yina vandaka ya kufuluka ti bampunda mpi bapusu-pusu ya bitumba ya tiya.

Ntangu basoda ya Siria mekaka kukanga Elisha, yandi sambaka nde: ‘Yehowa, pardo fwa bo meso.’ Na mbala mosi, ata bo vandaka kumona, basoda vandaka kuzaba diaka ve kisika yina bo vandaka. Elisha songaka  basoda yango nde: ‘Beno me vila mbanza ya beno ke sosa. Beno landa mono, ebuna mono ta nata beno kisika ya muntu yina beno ke sosa.’ Bo landaka Elisha tii na Samaria, kisika ntotila ya Izraele vandaka kuzinga.

Bantu ya Siria bakisaka na nsukinina kisika yina bo vandaka. Ntotila ya Izraele yulaka Elisha nde: ‘Keti mu fwete fwa bo?’ Keti Elisha sadilaka yo bonso dibaku ya kuvutula mbi na bantu yina sosaka kukotila yandi nsoki? Ve. Elisha tubaka nde: ‘Kufwa bo ve. Pesa bo madia mpi pesa bo nzila ya kukwenda.’ Yo yina, ntotila salaka feti ya nene sambu na bo mpi na nima yandi pesaka bo nzila ya kuvutuka na bwala na bo.