Masa wa Siiliaa wo ndoo nɔ diolaŋ ni aa Bɛnihadadi. O wa teleŋ o teleŋ Isɔluɛiya chiŋalaŋndo a sɔŋgaa. Kɛ teleŋ o teleŋ ndoo hiŋ pɛ, Ilaasia dimul masa wa Isɔluɛiyo a ndu okɔɔ, okoŋ Bɛnihadadi nyaanuŋ. Le hei, mi Bɛnihadadi kɛɛsiaa le Ilaasia biyɔɔ. Mɛɛ o sina maa Dotaŋ chiee Ilaasia cho ni, mbo viam puaa chɔuwaa Siiliaŋnda loŋ le ma kɔ bii ndu.

Mi Siiliaŋnda kua Dotaŋ a nyumndaŋ. Paaleŋ siɔɔ mi buɛi Ilaasia wo fula o bɛɛ, mbo cha mi puaa chɔuwa faŋga bɛndoo balu chioo silɔ. Mi siooŋnde bii ndu. Okoŋ mbo deŋi choo choo aa: ‘Ilaasia, yɛɛnɛ naŋ cho yɛ tosa?’ Mi Ilaasia dimul ndu aa: ‘Puaa chɔuwaa cho a naa latulu wa hiou puaa ndaa chɔuwa.’ Okoŋ, mi Chɛhowa tosa mi buɛi Ilaasia wo cha suaa, a nyɛla nyaanaŋnda suaa naŋ ndaŋ a tiuwaa silɔ o pembei choo. Nduyɛ mi yiŋndeŋ le kumbu nyɛla nyaanaŋnda suaa naŋ ndaŋ.

Mɛɛ puaa chɔuwaa Siiliaŋnda wa kindiŋndo le Ilaasia biyɔɔ, mi Ilaasia piɛi aa: ‘Yandii Chɛhowa, tosa mi puaa chɔuwa haa suma.’ O lepilɛ niŋ kpe, mi che bɛɛ puaa chɔuwa haa wa chɔɔ, kɛ ndaa sina lɛ fondaŋ nda wa wo le. Mi Ilaasia dimul nda aa: ‘La bendu chioo. La tol la kɔɔli mi kɔ chɔm  nya wana nya cho nuuviaa wo.’ Ma tual Ilaasia kɔɔli haaa ma fuuluu Sameeliaa, naa masaa Isɔluɛi wa wa.

Mɛɛ Siiliaŋnda sina naa nda wa wa, ndoo hiou niŋ lɔɔ. Okoŋ mi masaa Isɔluɛi nyuna Ilaasia aa: ‘I diu diu nda?’ Waŋnda haa wa kindiŋndo le Ilaasia nyɛpalaa tusioo choo. Kɛ baa Ilaasia ndoo yiyaŋ pa maa fondaa o sɔla koŋ ni le nda maa miŋgullo? Pɛ pɛ bɛɛ. Mi Ilaasia dimi aa: ‘Dii nda le. Ke nda nyɛdiaa ma de, ma miŋgi nda o nda lo.’ Okoŋ mi masaa toosiaa nyɛdiaa o hɔbɛi le nda, ma dia, mbo miŋgi nda o nda lo.