တၢ်မၤလိ ၅၂
ယဟိဝၤယွၤအသုးမုၢ်ဂီၢ်မုၢ်
စူၤရံအစီၤပၤဘ့ၣ်ဟဒး ဟဲဒုးဝဲပှၤအံၣ်စရ့လးဖိထီဘိလီၤ. ဘၣ်ဆၣ် မ့ၢ်လၢဝံအလံၤၡါဟ့ၣ်ပလီၢ်ဝဲ ပှၤအံၣ်စရ့လးဖိအစီၤပၤကိးဘျီဒဲးအဃိ စီၤပၤဃ့ၢ်ပူၤဖျဲးအသးန့ၢ်ဝဲထီဘိလီၤ. အဃိ စီၤဘ့ၣ်ဟဒးအဲၣ်ဒိး ဖီၣ်န့ၢ်ဝဲဝံအလံၤၡါလီၤ. စီၤဘ့ၣ်ဟဒး သ့ၣ်ညါဝဲလၢဝံအလံၤၡါ အိၣ်လၢဝ့ၢ်ဒိၤသၣ်အပူၤ အဃိအဝဲဆှၢလီၤဝဲ စူၤရံအသုးဖိတဖၣ်လၢ ကလဲၤဖီၣ်န့ၢ်ဝံအလံၤၡါန့ၣ်လီၤ.
ဖဲမုၢ်နၤခီန့ၣ် စူၤရံအသုးဖိတဖၣ်လဲၤတုၤဝဲလၢ ဝ့ၢ်ဒိၤသၣ်လီၤ. လၢခံတဂီၤန့ၣ် ဝံအလံၤၡါအပျဲၢ်တဂၤ လဲၤထီၣ်ဝဲလၢတၢ်ချၢ ဒီးထံၣ်စိဝဲစူၤရံအသုးဖိတဖၣ် အိၣ်ဝးတရံးဝဲဝ့ၢ်ဒိၤသၣ်န့ၣ်လီၤ. အဝဲပျံၤတၢ် ဒီးကိးပသူထီၣ်ဝဲလၢ– ‘ဝံအလံၤၡါဧၢ, ပကမၤဒ်လဲၣ်.’ ဝံအလံၤၡါတဲဘၣ်အီၤလၢ– ‘ပပှၤနီၣ်ဂံၢ်အိၣ်အါန့ၢ်ဒံး အဝဲသ့ၣ်လီၤ.’ ဖဲန့ၣ်အဆၢကတီၢ် ယဟိဝၤယွၤဒုးထံၣ် ဝံအလံၤၡါအပျဲၢ်တဂၤအံၤလၢ ကစၢၢ်လၢအအိၣ်ဝးတရံးဝ့ၢ်အံၤန့ၣ် ပှဲၤဝဲဒီးကသ့ၣ်မ့ၣ်အူ ဒီးလ့ၣ်ကဟၣ်မ့ၣ်အူန့ၣ်လီၤ.
ဖဲစူၤရံအသုးဖိတဖၣ် ကဟဲဖီၣ်ဝဲဝံအလံၤၡါအခါ အဝဲဃ့တၢ်မၤစၢၤလၢ ယဟိဝၤယွၤအအိၣ်လီၤ. ဝံၤဒီးယဟိဝၤယွၤ မၤဘံဘူဝဲပှၤစူၤရံအသုးဖိတဖၣ် အခိၣ်နူာ်အဃိအဝဲသ့ၣ် အိၣ်လၢတၢ်လီၢ်ဖဲလဲၣ်န့ၣ် တသ့ၣ်ညါဝဲလၢၤဘၣ်. ဒီးဝံအလံၤၡါတဲဘၣ်အဝဲသ့ၣ်လၢ– ‘သုဟဲဘၣ်လၢ ဝ့ၢ်လၢအကမၣ်တဖျၢၣ်လံ. ဟဲပိာ်ယခံ ယကလဲၤဆှၢသုလၢ ပှၤပိာ်ခွါလၢ သုဃုဖီၣ်အီၤတဂၤအအိၣ်န့ၣ်လီၤ.’ စူၤရံအသုးဖိတဖၣ်အံၤ လဲၤပိာ်ဝဲဝံအလံၤၡါအခံ တုၤလီၤလၢဝ့ၢ်ၡၤမရံလီၤ. ပှၤအံၣ်စရ့လးဖိအစီၤပၤန့ၣ် အိၣ်ဝဲလၢ ဝ့ၢ်ၡၤမရံအပူၤလီၤ.
ဖဲန့ၣ်အဆၢကတီၢ် ပှၤစူၤရံသုးဖိတဖၣ် သ့ၣ်ညါလီၤက့ၤအသးလၢ အဝဲသ့ၣ်ဟဲတုၤလၢ ဝ့ၢ်ၡၤမရံအပူၤလံ. ပှၤအံၣ်စရ့လးဖိအစီၤပၤသံကွၢ် ဝံအလံၤၡါလၢ– ‘မ့ၢ်ယကဘၣ်မၤသံအဝဲသ့ၣ်ဧါ.’ မ့ၢ်ဝံအလံၤၡါဟံးန့ၢ် တၢ်ခွဲးတၢ်ယာ်အံၤ ဒ်သိးကမၤသံဝဲပှၤသုးဖိတဖၣ်လၢ အအဲၣ်ဒိးမၤဆါအီၤန့ၣ်ဧါ. အဝဲတမၤဝဲဒ်န့ၣ်ဘၣ်. ဝံအလံၤၡါတဲဝဲလၢ– ‘တဘၣ်မၤသံအဝဲသ့ၣ်တဂ့ၤ. ဒုးအီၣ်အဝဲသ့ၣ်တၢ်အီၣ်တၢ်အီ ဒီးပျဲက့ၤအဝဲသ့ၣ်တက့ၢ်.’ လၢတၢ်န့ၣ်အဃိ စီၤပၤမၢပှၤဟဲစိာ်ဝဲ တၢ်အီၣ်တၢ်အီအါအါဂီၢ်ဂီၢ်, ဒုးအီၣ်ဝဲစူၤရံအသုးဖိတဖၣ် ဝံၤဒီးပျဲက့ၤအဝဲသ့ၣ်လီၤ.
“ပအိၣ်ဒီးတၢ်သူၣ်ဒူသးဒူလၢ ကစၢ်ယွၤအမဲာ်ညါ, မ့ၢ်လၢပနာ်လၢ ပမ့ၢ်ဃ့တၢ်တမံၤမံၤ ဒ်အတၢ်ဘၣ်အသးအသိးဒီး, အဝဲဒၣ်ကဒိကနၣ်ပှၤအဃိန့ၣ်လီၤ.”—၁ ယိၤဟၣ် ၅:၁၄, ခ့ခါစှီၤကျိာ်
