Benadadi wa ntinu a Suria wakwamanana nuanisa Isaele. Kansi, kalendanga kanga ntinu a Isaele ko kadi Elesa wa ngunza wanlukisanga vo katina. Muna kuma kiaki, Benadadi wabaka e nzengo za kanga Elesa. Vava banzayisa vo Elesa ku mbanza Dotane kakala, watuma makesa ma Suria benda kunkanga.

Makesa ma Suria balwaka muna mbanza Dotane muna fuku. Muna mene, selo kia Elesa wavaika kuna mbazi yo mona vo e mbanza izungilu kwa ulolo wa makesa. Wabakama kwa wonga yo kaza vo: ‘E mfumu ame Elesa, adieyi tufwete vanga?’ Elesa wamvovesa vo: ‘Ana bena yeto basundidi ana bena yau.’ Vana vau, Yave watemona meso ma selo kia Elesa yo mona vo e miongo miawonso miakala lukufi ye mbanza miazala ye mvalu ye makalu ma vita.

Vava makesa ma Suria bavava kanga Elesa, wasamba vo: ‘E Yave do, ubavonda e meso.’ Vana vau, makesa ke bazaya diaka ko vana bakala kana una vo meso mau matemoka makala. Elesa wavova kwa makesa vo: ‘E vata nuina ke diau ko.  Nundanda yanusonga o muntu nuvavanga.’ Balanda Elesa yakuna Samaria, kuna kwazingilanga ntinu a Isaele.

Vava makesa ma Suria babakula vana bakala, e ntangwa yadi viokela. O ntinu a Isaele wayuvula Elesa vo: ‘Nga yabavond’e?’ Nga Elesa wasadila e lau diadi mu landa e kunda kw’awana bavavanga kumvonda? Ve. Elesa wavova vo: ‘Kubavondi ko. Ubavana madia, wabasindika benda kwau.’ Muna kuma kiaki, o ntinu wavangisa nkinzi wampwena mu kuma kiau, i bosi wabasindika bavutuka kuna nsi au.