Mulena wa Siria, Beni-Hadadi, naazwezipili kulwanisa Isilaele. Kono ka nako kaufela, mupolofita Elisha naalemusanga mulena wa Isilaele, mi naakona kubaleha. Kacwalo, Beni-Hadadi abata kuuzwa Elisha. Atalusezwa kuli Elisha naapila mwa muleneñi wa Dotani, mi aluma mpi ya Masiria kuli bayo muswala.

Masiria bataha mwa Dotani busihu. Habusa kakusasana, mutangaa Elisha azwela fande mi abona kuli muleneñi neupotolohilwe ki mpi yetuna. Naasabile hahulu mi ahuwa kuli: ‘Elisha, ki lika mañi zeluswanela kueza?’ Elisha kihaa li ku yena: ‘Babainzi ni luna ki babañata kufita babainzi ni bona.’ Honafo, Jehova atahisa kuli mutangaa Elisha abone kuli malundu anaapotolohile muleneñi kaufela naatezi lipizi ni likoloi za ndwa za mulilo.

Masole ba Masiria hane babata kuswala Elisha, alapela ali: ‘Jehova tahisa kuli basike babona.’ Honafo feela, nihaike kuli nebakona kubona, masole nebasa zibi kone bainzi. Elisha kihaa li kwa masole: ‘Muinzi mwa  muleneñi usili. Hamu nilatelele, nimiise ku muuna yemubata.’ Balatelela Elisha kuyo fita ni kwa Samaria, ili kwanaapila mulena wa Isilaele.

Ka bumai, Masiria nebasika lemuha kapili kone bainzi. Mulena wa Isilaele abuza Elisha kuli: ‘Nibabulaye?’ Kana Elisha naangile muinelo wo sina kolo ya kueza maswe batu ba bane babata kumueza maswe? Batili. Elisha kihaa li: ‘Usike wababulaya. Bafe za kuca, mi ubalukulule kuli bakutele habobona.’ Kacwalo, mulena abaezeza mukiti omutuna mi kihona abalukulula.