Mwanta wakuSiriya, Benihadadi, watwalekelihu kulukuka aIsarela. Ilaña kaprofwetu Elisha wamusoñamishileña mwanta waIsarela mpinji yejima, dichi mwanta watemukili. Kuhiñahu Benihadadi wafuukwilihu kuya nakumukwata Elisha. Amulejeli nawu Elisha wudi mumusumba waDotani nawa watemesheli amashidika awaSiriya kuya nakumukwata.

ASiriya ashikili muDotani nawufuku. Hefuku dalondelelihu nantetemena, kambuña aElisha wedikili hanji nawa wamweni musumba anawunyeñumuki kudi amashidika amavulu. Watiyili woma chikupu nawa wabidikili nindi: ‘Elisha, tukwila ñahi?’ Elisha wamulejeli nindi: ‘Adi nanetu amavulu kubadika adi nawena.’ Hohenohu, Yehova wamuletesheli kambuña aElisha kumona mapidi ejima amumusumba anenzali natuwalu nimakalu anjita akesi.

Amashidika awaSiriya chakeñeleñawu nawu amukwati Elisha, walombeli nindi: ‘Eyi Yehova, mwani yiputishi.’ Hohenohu, hela chakwila achidiña kumona, amashidika hiyelukili kwadiñawuku. Elisha wayilejeli nindi: ‘Mudi mumusumba wacheñi. Nlondelenu, nukuyitwala  kudi muntu imunakukeña.’ Amulondeleli Elisha kushika nikuSamariya, kwashakamineña mwanta waIsarela.

ASiriya cheliliwu nawu atali, kukasumuka adi kwiluña dacheñi. Mwanta waIsarela wamwihwili Elisha nindi: ‘Niyijahi tahindi?’ Komana Elisha wamweni nindi iyi diyi mpinji yatelela yakujaha awa antu akeñeleña kumwila chuma chatama? Inehi. Wamwakwili nindi: ‘Bayi wuyijahaku. Yinki yakuda nawa wuyileki ayeña.’ Dichi mwanta wayiloñesheleli chawija cheneni nawa wayilejeli nindi afunti kumatala awu.