Beni Hadadi umwene uwa ku Asilya watwalilile ukuzanza Aina Izlaeli. Nomba lyonsi kasesema Elisya waneenanga umwene uwa ku Izlaeli, na cii calenganga ukuti mwene wii apusuke. Beni Hadadi wapingwilepo ukuyalema Elisya. Lino wizile amanya ukuti Elisya ali umu musumba uwa Dotani, watumile asilika Aina Asilya kuti yakamuleme.

Aina Asilya yaile uku musumba uwa Dotani usiku. Wanda uwalondelilepo katondo, muomvi wakwe Elisya wafumile panzi azana asilika aingi iyazinguluka umusumba. Uvwile intete apunda ati: ‘Elisya, tumacita uli?’ Elisya wamuneenyile ati: ‘Aali uku lusansa lwitu aingi kucila yano yali nayo.’ Pa nsita kwene iya, Yeova walesile ukuti muomvi wakwe Elisya alole imfwalasi na maceleta ya moto aingi pa myamba iyazingulwike umusumba.

Lino asilika Aina Asilya yalondanga ukulema Elisya, wapefile kuli Yeova ati: ‘Yeova napaapata leka yapafule.’ Nanti cakuti asilika yataatiile ukulola, yatamanyile kuno yaali. Elisya  waneenyile asilika yaya ati: ‘Imuponga musumba uno mulinzile ukuyako. Ndondelini namamilanga umonsi wino mukulonda.’ Yalondiile Elisya mpaka iyafika uku musumba wa Samaliya ukwikalanga umwene uwa Ina Izlaeli.

Papisile insita pakuti Aina Asilya yamanye kuno yaali. Umwene uwa ku Izlaeli uzizye Elisya ati: ‘Uzye njakome?’ Uzye Elisya waweni ukuti wakwata isyuko ilyakuzanza antu aalondanga ukumukoma? Awe foo. Elisya watiile: ‘Utayakoma. Yapeele ivyakulya nu kuyaleka yapita.’ Fwandi umwene wayapekanyizizye icimulo nupya pa cisila ca cimulo wayalesile iyapita kumwao.