Elõñ alen an kar Benhedad, kiiñ eo an Siria, kajjioñ in tarin̦aeiki aelõñin Israel. Ak ear jab lo tõprak ilo aolepen iien kein kõnke rũkanaan Ilaisha ear ba l̦o̦k im̦aan kõn pepe ko an ñan kiiñ eo an Israel. Kõn men in, Benhedad ear pepe in ko̦o̦tte Ilaisha. Ear roñ bwe Ilaisha ear pãd ilo juon jikin etan Dotan, im ear jilkinl̦o̦k kumi in tarin̦ae eo an ñan ijin bwe ren bõke Ilaisha.

Ke ear boñ, rũttarin̦ae rein jãn Siria rar tõpartok Dotan. Innem ilo jibboñõn raan eo tok juon, ke rijerbal eo an Ilaisha ear diwõjl̦o̦k jãn m̦weo, ear reilo̦k im loe juon kumi in tarin̦ae el̦ap rej kaapool̦e jikin eo rar pãd ie. L̦ein ear mijak, im ear lam̦õj im ba: ‘Ilaisha, kõjro naaj ita kiiõ?’ Ilaisha ear ba ñane: ‘Elõñl̦o̦k ro rej pãd ipperro jãn er.’ Ilo iien eo wõt, Jeova ear kõm̦m̦an bwe rijerbal in en maroñ reilo̦k im loe an aolepen tol̦ ko ipel̦aakin jikin eo obrak kõn kidia im jariot ko me reurur kõn kijeek.

Ke rũttarin̦ae ro jãn Siria rar kajjioñ in bõke Ilaisha, Ilaisha ear jar im ba: ‘Jeova, jouj im kõm̦m̦an bwe ren pilo.’ Innem ilo iien eo wõt, Jeova  ear kõm̦m̦an bwe ren jaje tuia eo rej pãd ie, ak ear kõtl̦o̦k wõt bwe ren maroñ lo kõn mejãer. Ilaisha ear ba ñan er: ‘Ejjab ijo in kom̦win kar itok ñane. Itok ippa im inaaj ãñinl̦o̦k kom̦ ñan armej eo kom̦ij pukote.’ Innem rar l̦oore Ilaisha l̦o̦k ñan Sameria, ijo kiiñ eo an Israel ear pãd ie.

Ke rũttarin̦ae rein rej kab jel̦ã tuia eo rej pãd ie, ear kiiõ kõptata ñan aer ko jãn ijo. Kiiñ eo an Israel ear kajjitõk ippãn Ilaisha: ‘Kokõn̦aan ke bwe in m̦an er?’ Kwõl̦ak lale, Ilaisha enaaj ke kar ukot nana kõn nana ñan armej rein me rar kajjioñ in m̦ane? Eokwe ear jab. Ilaisha ear ba: ‘Kwõn jab m̦an er. Kwõn lel̦o̦k kijeer, im jilkinl̦o̦k er bwe ren ro̦o̦l.’ Innem kiiñ eo ear kõpooj juon m̦õñã el̦ap ñan er, l̦ak m̦õj ear ba bwe ren ro̦o̦l ñan ãneo ãneer.