Siiri rĩm a Bɛn-hadaad ra wat n zabda ne Israyɛll nebã. La b sã n da watẽ, no-rɛɛs a Eliize togsda Israyɛll rĩmã, tɩ b pa tõe n paam-a ye. Rẽ n so t’a Bɛn-hadaad yãk yam n na n yõk a Eliize. A wʋmame t’a Eliize bee Dotã tẽngã, t’a tʋm a sodaasã tɩ b na n tɩ yõk-a.

Siiri sodaasã waa Dotã ne yʋngo. Vẽkembeoog yibeoogo, a Eliize tʋm-tʋmdã yiime n yã sodaas wʋsg sẽn gũbg tẽngã. A yɛɛsame n kelem n yeel yaa: ‘Eliize, tõnd na n kẽe yɛ?’ T’a Eliize yeele: ‘Sẽn be-b ne tõndã yɩɩda sẽn be-b ne bãmbã.’ Wakat kãng bala, a Zeova kɩtame t’a Eliize tʋm-tʋmdã yã wed-moos ka tɛka, ne saar-dãmb sẽn wit bugum, n be tãmsã zutu.

Siiri sodaasã makame n na n yõk a Eliize. La a pʋʋsa a Zeova n yeele: ‘Kɩt tɩ b lebg wa zoense.’ Zĩig pʋgẽ, sodaasã ra pa mi b sẽn  beẽ, baa ne b ninã sẽn da pa mumã. A Eliize yeel-b lame yaa: ‘Yãmb tudga sore. Wa-y tɩ m tall yãmb n kẽng rao ning yãmb sẽn baoodã nengẽ.’ A tall-b lame n kẽng hal Samaari, Israyɛll rĩmã nengẽ.

Siiri sodaasã wa n bãnga b sẽn beẽ, la rẽ tɩ sãam n saame. Israyɛll rĩmã soka a Eliize yaa: ‘M kʋ-b bɩ?’ Rẽ yĩnga, a Eliize na n baoome n dok a sũur ne sodaasã bɩ? Ayo. A yeela rĩmã yaa: ‘Da kʋ-b ye. Bao rɩɩb n kõ-ba, la f bas-b tɩ b kuili.’ Rĩmã maana kibs sodaasã yĩnga, la a bas-b tɩ b looge.