Tlanauatijketl Ben Adad, katli tlanauatiyaya ipan Siria, miakpa kiteuik Israel. Eliseo nochipa kimatiltiyaya tlanauatijketl tlen Israel kenijkatsa mochololtiskia. Yeka Ben Adad kinekiyaya kiitskis Eliseo uan kitsakuas. Kema kimatki Eliseo itstoya ipan altepetl Dotán, kintitlanki itlateuijkauaj ma kiitskitij.

Siriaeuanij asitoj Dotán ika tlayoua. Ika ijnalok kema Eliseo itlapaleuijka kiski, kinitak miakej tlateuianij kiyaualojtoyaj nopa altepetl. Tlauel momajmatik uan chikauak kiijtok: “Eliseo, ¿tlake tijchiuasej?”. Eliseo kinankilik: “Touaya itstokej tlauel miakej tlateuianij”. Uajka Jehová kichijki Eliseo itlapaleuijka ma kiita ipan nopa tepetinij itstoyaj miakej kauayojmej uan carros tlen lementoyaj.

Kema siriaeuanij nechka kiitskiskiaj Eliseo, ya momaijtok uan kiijtok: “Jehová, nimitstlajtlania, xijchiua ni tlateuianij ma mokauakaj ixpopoyotsitsij”. Uajka Jehová kichijki nopa tlateuianij amo ma kimatikaj kanke itstoyaj maske kena ueliyayaj tlachiaj. Eliseo kiniljuik: “Inmokuapolojtokej. Xinechtokilikaj, na niinmechuikas kampa  itstok nopa tlakatl tlen inkitemouaj”. Uajka inijuantij kitokilijtiajkej Eliseo, uan ya kinuikak Samaria kampa itstoya nopa tlanauatijketl tlen Israel.

Kema siriaeuanij kimatkej kanke itstoyaj, ayokmo uelkej mochololtiaj. Nopa tlanauatijketl tlen Israel kiiljuik Eliseo: “¿Tijneki ma nikinmikti?”. Maske siriaeuanij kinekiyayaj kiitskisej Eliseo, ya amo momakuepki. Kinankilik: “Amo xikinmikti. Xikintlamaka uan xikinkaua ma yakaj”. Uajka nopa tlanauatijketl kuali kintlamakak, uan teipa kinkajki ma tlakuepilikaj ininchaj.