Omukwaniilwa gwaSiria, Benhadad, okwa kala nokuponokela oshilongo shaIsraeli. Ihe omuhunganeki Elisa okwa kala nokulondodha aluhe omukwaniilwa gwaIsraeli, opo a vule okufadhuka po. Okuza mpono, Benhadad okwa tokola a kwate po Elisa. Benhadad oku uvu kutya Elisa oku li moshilando shaDotan. Okwa tumu ko etangakwiita lyaSiria li ke mu kwate po.

Etangakwiita olya thiki uusiku muDotan. Ongula sho kwa shi, omupiya gwaElisa sho a penduka e ta yi pondje, okwa mono kutya oshilando osha kondekwa kaakwiita oyendjiyendji. Omupiya gwaElisa okwa li a tila noonkondo. Okwi igidha a ti: “Otatu ningi ngiini?” Elisa okwe mu lombwele a ti: “Otu na oyendji ya gama kutse ye vule mboka ya gama kuyo.” Jehova okwa tonatitha omeho gomupiya gwaElisa pethimbo mpoka, e ta mono kutya oondundu adhihe moshilando odha kundukidhwa kuukambe owundji nosho wo komatembakwiita gomulilo.

Etangakwiita lyaSiria olya li tali kambadhala okukwata po Elisa, ihe okwa galikana a ti: ‘Jehova tsikitha aantu mbaka.’ Nonando aakwiita oya li ya  tonata, kaya li ye shi mpoka ye li. Elisa okwe ya lombwele a ti: ‘Omu li moshilando sha puka. Landulii ndje, notandi ke mu fala komuntu ngoka tamu kongo.’ Aakwiita Aasiria oya landula Elisa sigo omuSamaria, moka hamu kala omukwaniilwa gwaIsraeli.

Sho ye ke shi dhimbulula, oye li nale muSamaria. Omukwaniilwa gwaIsraeli okwa pula Elisa a ti: “Nandi ya dhipage?” Mbela Elisa okwa li a zimine aantu mboka ya li ya hala oku mu kwata po ya dhipagwe? Aawe. Elisa okwa ti: ‘Ino ya dhipaga. Ya pa iikulya nomeya, e to ya lombwele ya shune.’ Omukwaniilwa gwaIsraeli okwe ya ningile oshituthi oshinene, konima sho ya li nokunwa okwe ye etha ya shune koshilongo shawo..