Tekiuaj ipan Siria, Ben-Hadad, ok kixnamiktoya Israel. San ika, teotlajtoketl Eliseo nochipa kijliaya tekiuaj ipan Israel ijkuak kixnamikiskiaj, ijkon yejua cholouaya. Kuakon Ben-Hadad okinemili kajsis Eliseo. Yejua okimat ika Eliseo nemiya ipan ueyikalpan Dotán niman okintitlan soldados sirios makajsitij.

Sirios oajsikej Dotán ika yeuajli. Uajmostla, itekipanojkauj Eliseo okis niman okitak ika miyekej soldados yokiyeualojkaj ueyikalpan. Yejua melak onomojti niman otsajtsik: “Eliseo, ¿tlenon uelis tikchiuaskej?”. Yejua okinankili: “Melak miyekej touan nemij xijkon ken imiuan yejuamej”. Nimantsin Jehová okichiuj ika itekipanojkauj Eliseo makita ika tepemej tlen kiyeualouayaj ueyikalpan, tentoyaj ika caballos niman carros tlen ika tlaixnamikij tlachijchiujtin ika tlitl.

Ijkuak soldados sirios okiyejyekojkej kajsiskej Eliseo, yejua okichiuj teoyotl niman okijto: “Jehová nimitstlajtlanilia xchiua maka matlachiakan”. Soldados xok okimatkej kanon nemiyaj maski  tlachiayaj. Kuakon Eliseo okimijli: “Xyejuin ueyikalpan tlen nenkitejtemouaj. Xuajlakan nouan, nimechuikas kampa nemi tlakatl akin nenkitejtemouaj”. Eliseo okinuikak hasta Samaria kampa chantiya tekiuaj ipan Israel.

Ijkuak sirios okimatkej kanon nemiyaj, xok itlaj ouel okichiujkej. Tekiuaj ipan Israel okitlajtolti Eliseo: “¿Manikinmikti?”. ¿Notlakuepiltiskia Eliseo ipampa tlen okiyejyekojkej kichiuiliskej? Ka. Eliseo okijli: “Maka xkinmikti. Xkintlakualti niman xkinkauili mauiyan”. Kuakon tekiuaj okiyektlali se ueyi tlakuajli niman okinkauili manokuepakan inchan.