Ikosi yeSiriya, uBhen-Hadadi, beyisolo ihlasela ama-Israyeli. Kodwana umphorofidi u-Elitjha wayelelisa ikosi yakwa-Israyeli kiwo woke amahlandla, khona izakwazi ukubaleka. Ngebangelo uBhen-Hadadi waqunta ukuthumba u-Elitjha. Wafumana ukuthi u-Elitjha bekahlala eDathani, wathumela ibutho lamaSiriya bona liyombamba.

AmaSiriya la, eza kwaDathani ebusuku. Ekuseni ngelanga elilandelako, inceku ka-Elitjha yaphumela ngaphandle yabona ibutho elikhulu libazombelezile. Beyithukwe imanzi, yarhuwelela yathi: ‘Elitjha, kazi kufuze senzeni-ke nakunje?’ U-Elitjha wathi kiyo: ‘Abangakithi banengi khulu kunabangakibo.’ Khonokho, uJehova wenza ukuthi inceku ka-Elitjha ibone iimpera neenkoloyana zomlilo ebezizinengi zizombeleze neentaba.

Kuthe amaSiriya nakalinga ukubamba u-Elitjha, u-Elitjha wathandaza wathi: ‘Jehova, ngibawa uphophaze abantwaba.’ Khonokho amajoni lawo azange asazibona ukuthi akuyiphi indawo. U-Elitjha wathi emajonini lawo: ‘Idorobheli akusilo enilifunako. Ngilandelani,  ngizonisa emuntwini enimfunako.’ Alandela u-Elitjha, wakhamba nawo eSamariya, lapho ikosi yakwa-Israyeli ebeyihlala khona.

Amajoni la, kwanje alemuka ukuthi akuyiphi indawo. Ikosi yakwa-Israyeli yabuza u-Elitjha yathi: ‘Ngibabulale na?’ Inga-kghani u-Elitjha bekazokusebenzisa ithubeli bona azibuyiselele ebantwini ebebafuna ukumlimaza? Awa. Kodwana wathi: ‘Ungababulali. Banikele ukudla badle bese uyabatjhaphulula bakhambe.’ Ngalokho ikosi yabenzela umnyanya omkhulu ngemva kwalokho yabalisa babuyela ekhaya.