Síriya binaatʼáanii Ben-héídad éí Ízrel dineʼé yichʼįʼ anaaʼ hółǫ́. Ákondi Jiihóvah yá halneʼii Iiláísha éí Ízrel binaatʼáanii yił náhálnih, áko hachʼįʼ anaaʼ nízinígíí bitsʼąą nijigháh. Ben-héídad éí Iiláísha yideestsoł jiniizı̨́ı̨́ʼ. Iiláísha éí Dóthan kin haalʼáagi naagháago baa hozdiiztsʼą́ą́ʼ. Áko Ben-héídad éí hosiláo ákǫ́ǫ́ ajííłʼaʼ.

Tłʼéeʼgo Síriya bisiláo Dóthangi áłah silı̨́ı̨́ʼ. Abínígo Iiláísha bá naalʼaʼí chʼíníyáago tʼóó ahayóí siláo kin dah shijaaʼ yinásʼáago jiiłtsą́. Nídzísdzíidgo ájíní: ‘Iiláísha, haash dadiiʼnííł?ʼ Iiláísha áháłní: ‘Nihichʼijí danilínígíí éí áájí yichʼijí danilínígíí bilááh ánéelą́ą́ʼ.ʼ Iiláísha bá naalʼaʼí ákwii Jiihóvah kótʼéego hoł ííshjání áyiilaa. Dziłghą́ą́ʼdę́ę́ʼ łı̨́ı̨́ʼ índa anaaʼ biniyé tsinaabąąs ayóó átʼéego yílʼáago jiiłtsą́.

Síriya bisiláo Iiláísha kʼasdą́ą́ʼ dayiiłtsood, Iiláísha éí sodoolzin. Jiihóvah ííłní: ‘Tʼáá shǫǫdí, doo daʼooʼı̨́ı̨́góó ánílééh.ʼ Áko hanááʼ bee dajooʼı̨́į ndi, nijikaigi éí doo hoł béédahózin da.  Iiláísha siláo ííłní: ‘Hastiin hadanohtáhígíí doo kǫ́ǫ́ sidáa da. Shikééʼ wohkah,ʼ bizhdííniid. Iiláísha éí díí siláo Samériyagóó yiníʼeezh. Áadi éí Ízrel binaatʼáanii kééhatʼı̨́.

Síriya bisiláo daʼooʼı̨́ nídaasdlı̨́įʼgo, hoʼdeetʼeezhgi baa ákodazhniizı̨́ı̨́ʼ. Ízrel binaatʼáanii Iiláísha ííłní: ‘Naastseed, tʼáásh áko?ʼ Iiláísha atídeidoolííł yindahaʼá ńtʼééʼ ndi, Iiláísha éí doo kʼéédideeshnííł nízin da, áko dooda dííniid. Naatʼáanii éí díí siláo baʼdííłtsoł áádóó bighangóó bééʼdííłnih, yidííniid. Naatʼáanii éí Iiláísha áháłnínígíí beʼjiilaa.