Ohamba yo ko Silia itiwa Ben-Hadade, ovikando ovinyingi wahandele okuluisa ova Isilayeli. Mahi omuuli Eliseu ovikando ovinyingi ankho upopila ohamba yo Isilayeli, etyi Ben-Hadade ahanda okulinga. Mokonda yotyo Ben-Hadade ahande okuipaa Eliseu. Avasi Eliseu kepunda-umbo litiwa Dotan, atumu omafualali akakuate Eliseu.

Omafualali o Silia aehiki mepunda-umbo lio Dotan kounthiki. Etyi kuatya, omuundapi wa Eliseu alupuka amono okuti epunda-umbo likahi pokati kovita vimwe ovinene. Awele owoma apopi okuti: ‘Eliseu, matulingi ñgeni?’ Eliseu emupopila okuti: ‘Konthele yetu kuna vali ovanthu ovanyingi tyipona konthele yavo.’ Pomuvo watyo opo, Jeova aikula omaiho omuundapi wa Eliseu amono ko nomphunda mbukahi popepi nepunda-umbo kueyula ononkhambe mbotupia nomakalosa ovita.

Etyi omafualali ova Silia ahetekela okumukuata, Eliseu elikuambela okuti: ‘Jeova, mbambavo kalesa ovanthu ava ovamphoki.’ Namphila omafualali kaakalele umwe ovamphoki, mahi ankho pahe kavekwii  vali oku mavaende nako. Eliseu apopila omafualali okuti: ‘Mueya mepunda-umbo lihelio. Ndandulei, mandyimulekesa omulume mukahi nokuovola.’ Avalandula Eliseu alo ko Samaria, kuna kukala ohamba yo va Isilayeli.

Konyima ova Silia avaimbuka oku vekahi. Ohamba yo va Isilayeli aipulu Eliseu okuti: ‘Ndyipondola okuveipaa?’ Okuti Eliseu wasoka okuti ei omphitilo yokuipaa ovanthu ankho vahanda okumuipaa? Au. Eliseu wati: ‘Uheveipae. Veavela okulia ovetumu vaye.’ Ohamba yo va Isilayeli ailingila omafualali otyipito tyimwe otyinene konyima aivetumu vaye.