Siriamanta rey Ben-adadqa ashkha kutispi israelitaswan maqanakoj rerqa. Profeta Eliseotajrí rey Ben-adad rishasqanta yachaytawan, Israelpa reyninman ayqekunanpaj willamullajpuni. Chayraykutaj Ben-adadqa Eliseota japʼiyta munarqa. Chayrayku Dotanpi kashasqanta yachaspa, soldadosninta kacharqa japʼimunankupaj.

Soldadostaj Dotanman tuta chayarqanku. Qʼayantintaj Eliseoj kamachenqa tutamanta llojsimuspa ashkha soldadosta llajtaj muyuyninpi rikorqa. Mancharikuspataj nerqa: “Ay Eliseo, ¿imanasuntajri?”, nispa. Eliseotaj nerqa: “Paykunamanta nisqa noqanchejwan aswan ashkha kanku”, nispa. Chay ratopachataj Diosqa Eliseoj kamachinpa ñawisninta kicharerqa. Paytaj orqospi may chhika soldadosta caballospi, nina carretaspi ima rikorqa.

Chay soldadosqa Eliseota japʼiyta munarqanku. Chayrayku Eliseoqa orakorqa: “Kay runasta ciegoyachiy”, nispa. Chay soldadostaj manaña repararqankuchu maypichus kashasqankuta. Eliseotaj nerqa: “Pantaykamunkichej, noqa pusasqaykichej maskʼashankichej chay  runajman”, nispa. Paykunataj Eliseota qhaterqanku Samariakama. Chay llajtapeqa Israelpa reynin tiyakoj.

Soldadostaj Samariapi kashasqankuta reparakorqanku, nitaj imatapis ruwayta aterqankuñachu. Israelpa reynintaj Eliseota taporqa: “¿Wañurachisajchu?”, nispa. Eliseotajrí Siriamanta soldados sufrichiyta munajtinkupis, mana vengakorqachu, nerqataj: “Ama wañuchiychu. Mikhunata qospa kachapuy”, nispa. Chayrayku reyqa uj jatun mikhuyta waykʼucherqa, mikhurachiytawantaj kachaporqa.