Siriapa reynin Ben-Hadadmi israelïtakunawan atska kutichö pelyëta munarqan. Peru Diospa willakoqnin Eliseu tsëta willaptinmi Israelpa reyninqa imëpis escapakoq. Tsëmi Ben-Hadadqa Eliseuta tsaritsita munarqan. Y Dotan nishqan markachö këkanqanta musyarirmi tröpankunata tsëman kacharqan.

Siria tröpakunaqa paqas höram Dotanman chäriyarqan. Y patsa waräriptinmi Eliseupa yanapaqninqa rikärirqan tsë markapa jiruroqninchö mëtsika tröpakuna shëkäyaqta. Tsëmi alläpa mantsakar sinchipa kënö nirqan: “Eliseu, ¿imatataq kananqa rurashun?”. Eliseunam kënö nirqan: “Noqantsikwan këkaq tröpakunaqa pëkunapitapis masmi kayan”. Y Jehovä yanapariptinmi jirkakuna jananchö rikärirqan bestiankunawan y rawrëkaq carrëtankunawan këkaq mëtsika tröpakunata.

Siria tröpakuna tsariyänampaqna këkaptinmi Eliseuqa kënö mañakurqan: “Jehovä, llapankunata wiskuyäratsillë”. Tsëmi illaqpita juiciunkunata oqrariyarqan y musyayarqantsu mëchö këkäyanqanta.  Tsënam Eliseuqa kënö nirqan: “Pantarmi juk markaman shayämurqunki. Noqam ashiyanqëki nunaman apayashqëki”. Tsënö nirirmi Samariaman pushar Israelpa reyninman chäratsirqan.

Mëchö këkäyanqanta cuentata qokurirqa manam imanö këtapis puëdiyarqannatsu. Tsënam Israelpa reyninqa, “¿wanuratsïku?” nirqan Eliseuta. Y Eliseuqa, ¿“kananmi sïqa pëkunapita vengakurishaq” nirqantsuraq? Manam. Antis kënömi nirqan: “Ama wanutsitsu. Antis pachankuna qararir ëwakuyänanta jaqiri”. Tsënam Israelpa reyninqa cösa mikuratsir “wayikikunata ëwakuyë” nirqan.