52 KAQ YACHACHIKUY
Jehova Diospa angelninkunamanta
Siria nacionta kamachiq Ben-adadmi achka kutikama Israel kamachiqta wañuchinanpaq maskarqa, hinaspam Israel runakunatapas ñakarichirqa. Israelta kamachiqmi ichaqa ayqikurqa Diosmanta willakuq Eliseo willaptin. Chaymi Ben-adadqa Eliseota soldadonkunawan maskachirqa.
Chay soldadonkunam Eliseota presochanankupaq Dotan llaqtaman tuta chayarurqaku, hinaspam achikyaqman chay llaqtata chawpicharurqaku. Chayta rikuruspam Eliseopa yanapaqninqa mancharisqallaña qaparispa nirqa: “Eliseo, ¿imapitaq rikukunchik?”, nispa. Payñataqmi nirqa: “Ama llakikuychu, ñuqanchikwanmi aswan achkaqa kachkan”, nispa. Chaynata niruptillanmi Jehova Diosqa Eliseopa yanapaqninpa ñawinta kichaykurqa, hinaptinmi muyuriqnin urqukunapa hawanpi achkallay-achka caballokunatawan achkirichkaq carretakunata rikururqa.
Eliseoqa presochachikunanpaqña kachkaspanmi Diosta mañakurqa Siria soldadokuna ñawsayarunankupaq, chaynapim soldadokunaqa
maypi kasqankutapas mana musyakurqakuchu. Eliseoñataqmi paykunata nirqa: “Kay llaqtamanqa pantaramunkichikmi, ñuqam pusasqaykichik chay maskasqaykichik runaman”, nispa. Hinaspam Samaria llaqtaman pusarurqa, chaypim yacharqa Israelta kamachiq.Siria soldadokunaqa chayraqmi musyakururqaku Israelta kamachiqpa makinpi kasqankuta. Israelta kamachiqpas Eliseotam tapurqa: “¿Kay runakunata wañurachisaqchu?”, nispa. Eliseoñataqmi enemigonkuna kachkaptinpas kamachiqta nirqa: “Ama wañuchispalla mikuykachispa kachaykuy”, nispa.
“Ñuqanchikqa manam iskayrayanchikchu munasqanman hina mañakuptinchik Dios uyariwasqanchikmantaqa” (1 Juan 5:14).