Siria nacionmanta rey Ben-hadadmi askha kutipi Israel nacionta atacayta munaran. Profeta Eliseon ichaqa Israelpi reyman willaq, jinan Israel soldadokunaqa ayqekuqku. Chaymi Ben-hadadqa soldadonkunata kacharan Eliseota jap’imunankupaq. Payqa Dotán llaqtapin kasharan.

Tutatan soldadokunaqa llaqtaman chayamuranku. Tutamantantaq Eliseoq yanapaqninqa rikuran askha soldadokuna paykunata muyuykusqanta, jinan Eliseota niran: “Ay señorniy imanaykusuntaq”, nispa. Jinan Eliseoqa niran: “Ama manchakuychu, noqanchiswanmi aswan askha kashanku”, nispa. Chay raton Diosqa Eliseoq yanapaqninman rikuchiran llapa orqo muyuriqninpi caballokunayoq nina carretakunayoq ejercitota.

Siria soldadokuna Eliseota jap’iyta munaqtinkun, payqa Diosmanta mañakuran: “Diosníy, kay soldadokunata ñausayachiy”, nispa. Jinan soldadokunaqa rikusharankuña chaypas, mana reparakurankuchu maypi kashasqankuta. Chaymi Eliseoqa niran: “Manan kaypichu  tarikun maskhasqaykichis runaqa, payman pusasaykichis”, nispa. Jinan reypa tiyasqan Samaria llaqtaman pusaran.

Eliseota jap’iyta munaq soldadokunaqa wañuy patapi kashaspañan reparakuranku maypi kashasqankuta. Chaymi Israelmanta reyqa Eliseota tapuran: “¿Wañuchisaqchu?”, nispa. Eliseon ichaqa niran: “Ama wañuchiychu, aswanpas mijuchispa kachapuy”, nispa. Jinan reyqa mijuchispa chay soldadokunata kachapuran.