O kralj andi Sirija, o Ven-Adad, nastavindža te borini pe e Izraeleja. Ama, svako puti ked o Sirijcija manglje te napadinen e kraljo ando Izrael, o Ilija upozorindža lje hem adžahar ov uvek uspindža te spasini pe. O Ven-Adad manglja te astari e Jeliseje hem te phanel lje. Ked šundža soj tano o Jelisej ki diz Dotan, bičhaldža pe vojska te astaren lje.

O vojnikija reslje ko Dotan račate. Tajsato dive, e Jelisejeso sluga ikljilo avrijal hem dikhlja so i bari vojska opkolindža celo diz. Ov but darandilo hem phendža: „Jelisej, so ka čera akana?“ O Jelisej phendža ljese: „Amari vojska tani pobari, nego oljengi.“ Ko odova trenutko, o Jehova čerdža e Jelisejeso sluga te dikhel so o planine uzi diz tane pherde grastencar hem kočijencar andi jag.

Ked o sirijska vojnikija manglje te astaren e Jeliseje, ov molindža pe: „Jehova, korjačer ljen.“ Iako na hine čače korore, o vojnikija odobor bunindže pe so naštindže te haljon kuri tane. O Jelisej phendža e vojnikonendže: „Tumen hijen ki pogrešno diz.  Aven mancar, ka ljegarav tumen ko manuš kolje rodena.“ On dželje palo Jelisej hem ov ljegardža ljen ki Samarija, ki diz kuri živindža o kralj ando Izrael.

O Sirijcija haljilje kaj tane, ama hine kasno. O kralj ando Izrael pučlja e Jeliseje: „Te mudarav ljen?“ Da li o Jelisej koristindža akija prilika te irini ljendže lošnipaja sar so on manglje te čeren oljese? Na. O Jelisej phendža: „Ma mudar ljen. De ljen te han hem mukh ljen te džan pese.“ Odoljese, o kralj čerdža bari zabava hem ko krajo mukhlja ljen te džan pese.