О сирийско царё Венададо камля инке еқвар тэ дэл по израильско царство. О пророко Елисеё кажно разо ԥэнэнас лэ израильсконэ царёсти, кала и каринг камэн тэ дэн и сирийски воиноря. Тоди о израильско царё моӷ тэ обжал кодэла ҭана. Важ када о Венададо закамля тэ астарэл лэ Елисеёс. Кала о Венададо уӷангля, кай о Елисеё андо форо Дофано, во бишалдя кордэ пэстирэ воинонэн, кай тэ астарэн лэ пророкос.

И рят и сирийски воиноря авелэ каринг о форо Дофано. Тэсара лэ Елисеёско слуӷо ущеля и додиқля, кай круӷом форо тердён бут воиноря. О слуӷо пэрэдарайля и зацыписайля: «Елисеё, со амэнди тэ терас?» О Елисеё ԥэндя: «На дар. Амэнца май бут, чем лэнца». И андэ кадэя время о Иегова дя тэ диқэл лэ слуӷости акэ со. Пэ всаворэ плая, савэ круӷом форо, слинэ фартэ бут граста и вурдона важ и война. Кадэла граста и вурдона слинэ анда яг.

Кала и сирийски воиноря линэ тэ дэн пэр лэндэ, о Елисеё ля тэ мангэлпэ: «Иегова, мангав тут, стер кадя, кай вонэ тэ коравэн». И акэ, и воиноря парашэлэ тэ полэн, кай вонэ, хоть и на корайлэ  па чачимастэ. О Елисеё ԥэндя лэнди: «Тумэ авелэ най андэ кодэва форо. Жан пала мандэ, и мэ андярава тумэн андэ кодэва форо, кай исин о мануш, савэс тумэ родэн». О Елисеё андярдя лэн андо форо Самария, кай жувэлас о израильско царё.

И сирийски воиноря полинэ, со стредяпэ кати тоди, кала авелэ андэ Самария. О израильско царё пушля кай о Елисеё: «Со манди лэнца тэ терав? Тэ умарав лэн?» Акана о Елисеё, моӷ тэ рий лэнди кода, со вонэ камлэ тэ стерэн лэсти. Но во на ля када тэ терэл. О Елисеё ԥэндя: «На умар лэн. Правар и одмэк лэн». О царё кадя и стердя. Во стодя бут со тэ пэн, тэ хан лэ сирийсконэ воинонэнди, ай тоди вонэ жылэ цэрэ.