Sooriyu moote Benihadaadi Israeele qasa diagurino. Ikkollana masaalaanchu Elsai, Israeelete moote maaxamanno gede duucha hige kulinosi. Konni daafira Benihadaadi Elsai qafade haaˈre haˈrara hedino. Benihadaadi Elsai Dootaani yinanni katamira noota afi; hakkiinni Sooriyu olanto iso amadde abbitara soyi.

Sooriyu olanto hashsha Dootaani katama iillitu. Layinki soodo, Elsai soqqamaanchi gobbara fulanno woyite katama olanto doyissite no. Isi lowo geeshsha waajjino daafira Elsaira togo yii: ‘Elsai, ma assinummoro woyyanno?’ Elsai qole, ‘Ninke ledo noo olanto insa ledo noota roortanno’ yiisi. Hakkiinni Yihowa, Elsai soqqamaanchi ilaalu aana lowo faradinna giirate faradi-gaare noota laˈˈanno gede assi.

Sooriyu olanto Elsai amaddara dagguta isi togo yee huucciˈri: ‘Yihowa, ballo konne manna ille ballisi.’ Hakkawoyintenni, insa laˈˈa dandiitannoha ikkirono, noowi bainsa. Elsai togo yiinsa: ‘Doogo sodhinoonni. Hasidhinoonni katami konne diˈˈikkino. Hasidhinoonni manchiwa haaˈre masseemmoˈnena hoodeˈya amme.’ Hakkiinni olanto  Elsai hoode hadhe, Samaariyu katama iillitu; Israeelete moote heeˈrannohu Samaariyu katamiraati.

Gedensaanni Sooriyu olanto mama nooro affu. Israeelete moote, ‘Tenne olanto shooni?’ yee Elsai xaˈmi. Elsai tenne faro horoonsiˈre iso shaara hasiˈrino manna rabbisiˈrate hedinoni? Dihedino. Isi togo yiino: ‘Shitootinsa. Ittannorenna aggannore uyite gobbansa haˈrisi.’ Konni daafira, Israeelete moote lowo jila jile itisinsa gedensaanni gobbansa haˈrisino.