Ben-Hadade, nfumu a mu Sirii baadi mutungunukye na kulwisha beena Isaleele ngoshi. Anka mutemuki Elisha baadi adimusha nfumu a Isaleele musango ooso, nyi bwakinyi bapandjile. Ben-Hadade nkwata kitshibilo kya kukwata Elisha. Pabaukile shi Elisha e mu lupata lwa Dotane, baadi mutume kilwiilo kya beena Sirii kwakwa bwabadya nkamukwata.

Beena Sirii nkufika bufuku ku Dotana. Butookye ku namashika, mufubi a Elisha baatukile paasha aye nkumona shi lupata lubaadi lwifunyishwe na kilwilo kikata kya ngoshi. Baapushiishe moo ukile aye nkusama shi: ‘Elisha, atukitshi kinyi?’ Elisha nkumulungula shi: ‘Bee neetu mbakile bee nabo bungi.’ Mu yaaya nsaa, Yehowa nkufungula mufubi a Elisha meeso, aye nkumona shi mu myengye iifunyishe lupata mubaadi muwule na nfwalasa na matempu a ngoshi ee na kaalo.

Pabatompele kilwilo kya beena Sirii kukwata Elisha, batekyele shi: ‘Yehowa, ela bu mpofu kwi kino kisamba.’ Sunga byekala shi  abaadi abamono, basalayi tababaadi bya kutundula kubaabadi nya. Elisha nkulungula basalayi shi: ‘Nwi mu lungi lupata. Ndondeeyi nkenuleeshe kwi muntu aanukimbi.’ Abo nkulonda Elisha mwishinda dya ku Samariya kubaadi nfumu a beena Isaleele mushale.

Kunyima kwa kipindji, beena Sirii abatundwile kwabaadi. Nfumu a mu Isaleele nkwipusha Elisha shi: ‘Ne mulombeene kwibayipaa?’ Elisha bamwene bu nsaa yaadya kufudiisha uno mwilo ubaadi aukimbi kumwipaa su? Nya. Elisha bakwile shi: ‘Twebayipanga. Ebape kya-kudya webalekye beende.’ Nfumu nkwibakitshiina madyo akata akupu nkwibaleka shi baalukye kwabo.