Ben-hadad, datung Siria, masau lumawang tau Israel. Katewe, Nabi Elisa turusẹ̌ měgẹ̌gělị laingatẹ̌ su datu Israel hakị u ene datu ene botonge makatal᷊ang. Ben-hadad mapulu měnamẹ si Elisa. I sie masingkạ i Elisa su soa Dotan, kụ i sie něngoro pasukan Siria pěnamẹ si Elisa.

Tau Siria nakoạ sarang Dotan su tempong hěbi. Dịěllone mal᷊ukadẹ̌, ělang i Elisa siměbang, kụ i sie nakasilo soa ene seng niliwungangu pasukan Siria. I sie sěbạe natakụ kụ nẹ̌bera si Elisa, ’Tuang, apa koateng i kitẹ?’ Elisa simimbahẹ̌, ’Piạ limembong mal᷊awọ dingangi kitẹ sul᷊ungu dingangi sire.’ Su tempo ene lai, Yehuwa někoạ ělang i Elisa nakasilo kawal᷊o dingangu karetang perang piạ putunge su manga wul᷊udẹ̌ su soa ene.

Su tempong pasukan Siria mapulu měnamẹ si Elisa, Elisa nẹ̌doa nẹ̌dorong tul᷊ung si Yehuwa. Yehuwa někoạ manga pasukan ene nẹ̌bingọ kụ běga i sire su apa. Elisa nẹ̌bera si sire, ’I kamene seng  nẹ̌sal᷊a ral᷊eng. Tol᷊ẹe si siạ. Iạ sarung měngahạ si kamene sarang tampạ u taumata dẹ̌deakeng i kamene.’ I sire timol᷊e si Elisa sarang Samaria, tampạ pẹ̌tatanakengu datung Israel.

Samurine, tau Siria nasadarẹ̌ su apa i sire, katewe ene seng tawẹ apa gunane. Datung Israel nẹ̌kiwal᷊o si Elisa, ’Apa iạ harusẹ̌ měmate si sire?’ Apa i Elisa sarung měmal᷊isẹ̌ ual᷊ingu i sire mapulu měkoạ barang dal᷊akị si sie? Tala. Elisa naul᷊ị, ’Abe pate i sire. Pěgělị kaěng si sire bọu ene oro pakapul᷊ẹ.’ Hakị u ene, datu někoạ pesta gěguwạ gunang i sire, bọu ene něngoro si sire pakapul᷊ẹ.