ISTÓRIA 52
Jeová nia tropa neʼebé forsa boot
Liurai Ben-Hadad husi rai-Síria ataka beibeik Izraél. Maibé liurai Izraél konsege sees husi perigu tanba profeta Eliseu sempre fó avizu nanis ba nia. Tan neʼe, Ben-Hadad deside atu kaer Eliseu. Nia rona katak Eliseu iha sidade Dotan, entaun nia haruka tropa Síria bá neʼebá atu kaer Eliseu.
Iha kalan tropa Síria bá Dotan, no dadeer tuirmai bainhira Eliseu nia ajudante sai ba liʼur, nia haree tropa barak haleʼu sidade. Nia taʼuk no hatete ba Eliseu: ‘Haʼu-nia naʼi, ita sei halo saida?’ Eliseu dehan: ‘Keta taʼuk! Tropa neʼebé hamutuk ho ita mak barak liu fali sira.’ Tuirmai, Jeová halo ajudante neʼe haree kuda no kuda-karreta funu nian neʼebé barak no nabilan hanesan ahi iha foho neʼebé haleʼu sidade neʼe.
Bainhira tropa Síria koko atu kaer Eliseu, nia halo orasaun hodi husu Jeová nia ajuda. Tan neʼe, Jeová halo tropa sira-neʼe konfuzaun no la hatene sira iha neʼebé. Eliseu dehan ba sira: ‘Imi laʼo sala dalan. Mai tuir haʼu, haʼu sei lori imi ba mane neʼebé imi buka daudaun.’ Sira tuir Eliseu toʼo Samaria, neʼe mak fatin neʼebé liurai Izraél hela.
Ikusmai tropa Síria foin rekoñese katak sira toʼo iha fatin neʼebé sala, maibé tarde ona. Liurai Izraél husu Eliseu: ‘Haʼu bele oho sira ka lae?’ Eliseu sei selu aat ba sira ka lae? Lae. Eliseu dehan: ‘Labele. Fó ai-han ba sira no haruka sira fila.’ Tuirmai liurai halo festa boot ba sira no haruka sira fila fali ba sira-nia rai.
“Ita fiar nia, katak buat naran deʼit neʼebé ita husu hodi tuir ninia hakarak, nia rona ita.”—1 João 5:14
Karik Ita sei gosta
LIVRU HAKLAKEN—ESTUDU NIAN
Eliseu haree kuda-karreta neʼebé ahi lakan—Oinsá ho ita?
Maski tropa Síria haleʼu Eliseu, maibé nia kalma hela tanba nia tau fiar ba Jeová no hatene katak Jeová sei proteje nia. Saida mak ita bele aprende husi ninia ezemplu neʼe?
