Benhada, tor u tar u Shiria yange a zer van a shoja na va tan ityav sha tar u Iserael gbem. Kpa hanma shighe yô, profeti Elisha a vande tan tor u Iserael icin tsuaa, nahan a yevese a war. Nahan Benhada kaa ér una tindi ior nav ve za kôr Elisha sha agee ve va a na ken Shiria. Yange i ôr un ér Elisha ngu hen geri u Dotan, nahan a tindi shoja i Shiria her ér ve za kôr un.

Tsô Mbashiria va nyôr hen Dotan tugh. Kpernan pepe wanye u Elisha duen ken won yô, a nenge shoja kase geri u Dotan ningir tser. Ushoja mbara ngee je cier iyol. Nahan cier un iyol je a ngor ér: ‘Kpei Elisha, se er nena?’ Elisha gema kaa a na ér: ‘Ushoja mba ve lu a vese hemba ngeen a mba ve lu a ve la.’ Hen shighe la je, Yehova bugh wanye u Elisha la ashe, a nenge anyinya man akekeautya a usu kpuruaa sha iwo i i kase geri u Dotan la cii.

Ushoja mba Shiria mba nguren nôngon ér vea kôr Elisha yô, Elisha er msen kaa ér: ‘Yehova, wea lumun yô, pir ve ashe.’ Ica i gbe ga yô, ushoja mbara hingir tumbuluu, ve kera fa ijiir i ve lu her la ga. Tsô Elisha kaa a  ve ér: ‘Ka geri shon ne ga. Kar se yem nen m za tese ne or u ne keren la.’ Elisha maa yem a ve ken Samaria, hen ape tor u Iserael lu la.

Mbashiria mbara mba va kaven ape ve lu yô, shighe kar u vea er kwagh u i tindi ve la. Tsô tor u Iserael pine Elisha ér: ‘M wua vee?’ Elisha yange lumun ér i wua ior mbara, sha ci u ve nôngo ér vea kôr un yum he? Ei. Elisha gema kaa ér ‘De wuan ve ga. Na ve kwaghyan, vea yaan cii yô, na ve gbenda ve yem.’ Tsô tor u Iserael kaa i yôr ve iwer kpishi, mba ye yô, a na ve gbenda ve hide ve yem ken tar ve.