Benihadadi, fumu ya Siriya yingulutiriza kuyukiya Ayisraele. Mchimi Elisha watcheŵesanga fumu ya Ayisraele asani fumu ya Siriya yikhumba kuyiyukiya. Ivi vinguwovya kuti fumu ya Ayisraele yileki kukoleka. Mwaviyo, Benihadadi wanguŵanaŵana kuti wakako Elisha. Iyu wanguvwa kuti Elisha wenga mumsumba wa Dotani ndipu wangutuma asilikali ŵaki kuti akamuko.

Asilikali a ku Siriya anguza ku Dotani ndi usiku. Ndi mulenji, muteŵeti waku Elisha wangutuwa kubwalu ndipu wanguwona kuti msumba wo wazungulirika ndi gulu likulu la asilikali. Iyu wanguchita mantha ndipu wangudaniriza kuti: ‘Elisha tichitenji?’ Elisha wangukamba kuti: ‘Isi te ndi anandi kuluska wo ŵe ndi yiwu.’ Nyengu yeniyo, Yehova wanguchitisa kuti muteŵeti waku Elisha wawoni kuti mapiri ngo nganguzunguliya msumba wo ajanga, ngenga ndi mahachi nganandi ndi magareta nga nkhondu ngakofya.

Pa nyengu yo asilikali a Siriya akhumbanga kuko Elisha, iyu wanguromba kuti: ‘Yehova, chondi achitiseni kuti aleki kuwona.’ Mwamabuchibuchi, asilikali yaŵa anguziŵaku cha ko ŵenga chinanga kuti awonanga. Elisha  wangukambiya asilikali wo kuti: ‘Mwe mumsumba wo mupenja cha. Ndilondoni nkhakulongoni munthu yo mupenja.’ Yiwu angulondo Elisha mpaka ku Samaria ko kwajanga fumu ya Ayisraele.

Asilikali a Siriya anguziŵa mwakuswera ko ŵenga. Fumu ya Ayisraele yingufumba Elisha kuti: ‘Kumbi ndiŵabayi?’ Kumbi Elisha wanguwona kuti uwu wenga mwaŵi wakuweze ŵanthu yaŵa, wo akhumbanga kumuchitiya vinthu viheni? Awa. Elisha wanguti: ‘Kuŵabaya cha. Apaseni chakurya ndipu muŵakambiyi kuti awere kwawu.’ Mwaviyo, fumu yo yinguŵanozge phwandu la chakurya ndipu pavuli paki, yinguŵakambiya kuti akengi.