Ja mandaranum Ben-hadad bʼa Siria yixtalaʼan jitsan ekʼele ja Israel. Pe ja aluman Eliseo tolabida yalyabʼ ja mandaranum bʼa Israel bʼa oj spak ajnel. Ja yuj ja Ben-hadad spensaraʼan oj syam ja Eliseo. Yabʼ yabʼalil tey bʼa Dotán sok sjeka ja kʼakʼanumik bʼa Siria bʼa oj syame.

Ja kʼakʼanumik kʼotye yoj akwal ja bʼa Dotán. Yajni el ja kʼakʼu, ja skoltuman ja Eliseo eli sok yila ja chonabʼ joybʼanubʼal yuj jitsan kʼakʼanum. Jel xiw juntiro sok awani: «Eliseo, ¿jas oj jkʼuluktik?». Ja Eliseo sjakʼa: «Masni jitsan ja jmojtik yuja yeʼnle». Ja bʼa jutsʼin jaw, ja Jyoba yaʼakan ja skoltuman ja Eliseo ayil ja witsik sjoybʼunej ja chonabʼi bʼutʼel kawujik sok karroʼik bʼa kʼakʼ bʼa kʼakʼanel.

Yajni ja kʼakʼanumik sleʼawe modo syamjel ja Eliseo, ja yeʼn yayi jun orasyon: «Jyoba, awa pabor, aʼakan mok yile kʼinal». Junta chʼaykʼujol, ja kʼakʼanumik mi snaʼawe bʼayeʼa ama wanto xbʼobʼ ilwanuke. Anto ja Eliseo yala: «Chʼayex, mi jaʼuk ja chonabʼ bʼayexi. Nochowonik, oj kiʼex och ja bʼay ja winik wanex slejeli». Ja yeʼnle  snochowe ja Eliseo man kʼotye bʼa Samaria. Tini ay tiw ja mandaranum bʼa Israel.

Tito snaʼawe bʼaye ja kʼakʼanumiki, pe mixani oraʼuk. Ja mandaranum bʼa Israel ti sjobʼoyi ja Eliseo: «¿Oj maʼ jmil-e?». Ja kʼakʼanumik bʼa Siria sleʼuneje modo yixtalajel ja Eliseo, pe ¿ya maʼ stup ja Eliseo? Miyuk. Ja yeʼn sjakʼa: «Moka mil-e. Ayi swaʼele sok aʼakan awajuke». Ja yuj ja mandaranumi xchapa jun niwan waʼelal sok tsaʼan sjeka bʼa snaje.