Siria anapu rei Ben-Hadad, uánikua uelta no sési ambe úkuspti Israelini. Peru profeta Eliseu méntkisï aiangusïrendi Israeli anapu reini paraka sïpakuarhipiringa. Ísï jimbo, Ben-Hadad eratsispti jupikani Eliseuni. Eiangunhaspti eska Eliseu ireta Dotáni jimbo jarhaspka ka axaspti ejersituni paraksï jupikani.

Siriuechaksï chúrikua niáraspti Dotáni. Pauandikua, Eliseueri jarhuajpiri uéraspti ka exespti eska kʼéri ejersitu ma uirhipandatixapka iretani. Kánikua chéspti ka uinhachaspti: “Eliseu, ¿ambechi uá?”. Ka Eliseu arhispti: “Sánderu soldaduechaksï jarhasti juchantsïni jingoni eska imechani jingoni”. Ka jimajkani, Jeoba úspti eska Eliseueri jarhuajpiri exeapiringa uánikua kabaiuechani ka karruechani engaksï chpiriripka, juátecharhu engaksï iretarhu uirhipandani japka.

Engaksï soldaduecha uékapka jupikani Eliseuni, ima kómarhispti: “Jeoba, jimboetakua ú eskaksï siegu pakaraaka”. Ka ma repentku, soldaduechaksï mirinchespti, nájkirukaksï útasï uénga exeni. Jimajkani Eliseu arhiaspti: “No ísti ireta engajtsï jirinhantani jaka.  Chúngumajtsïni je, paakaksïni nani enga jaka ima achati engajtsï jirinhantani jaka”. Soldaduechaksï chúxapaspti Eliseuni asta Samaria jamberi. Jima irekaspti Israeliri rei.

Ka engaksï jamberi siriuecha kuenta íntskukuarhipka nani engaksï japka, tʼuini kánikua tiempu nitamasptia. Israeliri rei kurhamarhispti Eliseuni: “¿Uándikuaua?”. Antesi, siriuechaksï jámasptia no sési ambe úkuni Eliseuni, peru ¿aprobecharipirini ini ambe para bengarikuarhini? Nómbe. Eliseu arhispti reini: “Asï uándikua. Tʼireraa ka jurajkua eskaksï kʼuanhatsintaaka”. Ísï jimbo, rei kánikua tʼirekua prepararikuaspti ka tátsekua jurajkuaspti paraksï níntani.