Арамей хаан Венадад Израильче хөй катап халдаар деп турган. Ынчалза-даа Элисей Израильдиң хаанынга баш удур сагындырарга-ла, ол дайзынның холунче кирбес турган. Ынчангаш Венадад Элисейни тудуп алыр дээн. Элисейни Дотанда деп дыңнааш, ол аг-шериин ынаар чоргузупкан.

Арамей дайынчылар Дотанга дүне чедип келген. Элисейниң чалчазы даң бажында туруп келгеш көөрге, хоорайны долгандыр аг-шериг бүзээлеп алган болган. Ол аажок корткаш: «Элисей, канчаар бис ам?» — деп алгырыпкан. Элисей аңаа: «Кортпа! Бистиң талавыста шериг оларның талазында шеригден оранчок хөй» — деп харыылаан. Ол үеде Иегова чалчага хоорайны долгандыр турар даглар кырында оттуг аъттарны болгаш дайынчы тергелерни көргүзүпкен.

Арамей дайынчылар халдаар деп баарга, Элисей: «Иегова, өршээп көрем, оларны согурартып каап көрем» — деп мөргээн. Ынчан оларның угааны төөреп, карактары согурара берген дег апарган. Олар кайда турарын билбейн турганнар. Элисей оларга: «Силер аза берген-дир силер. Дилеп турар кижиңерниң хоорайынче силерни ам  аппаар мен. Мээң соомдан чоруп олуруңар» — дээн. Элисей оларны Израильдиң хаанының чурттап турар чери Самарияже эккелген.

Чүгле Самарияга чедип келгеш, чүү болганын олар билип каан. Израильдиң хааны Элисейден: «Оларны канчаар мен? Өлүрүп кааптар бе?» — деп айтырган. Аңаа хора чедирер деп турган улустан Элисей өжээн негээн бе? Чок. Элисей мынча дээн: «Оларны өлүрбейн, ашкарып-чемгергеш, салыптыңар». Арамей дайынчыларга улуг дойну белеткээш, хаан оларны чандырыпкан.