Ep ta velta la stsak ta kʼop steklumal Israel li ajvalil ta Siria ti Ben-ada sbie. Pe li j-alkʼop Eliseoe persa onoʼox baʼyel chalbe batel li ajvalil ta Israel yoʼ snakʼ sbae. Li ajvalil Ben-adae, la snop chchuk batel li Eliseoe. Vaʼun kʼalal laj yaʼi ti te oy ta jteklum Dotan li Eliseoe, la stakʼ batel yajsoltarotak yoʼ xbat xchukik talele.

Akʼobaltik xa ox kʼalal kʼotik ta Dotan li jsiriaetike. Kʼalal sakub osile, li yajtunel Eliseoe laj yil ti joyobtabil ta epal soltaroetik li jteklume. Solel xiʼ tajek, vaʼun xi tsots avane: «¡Eliseo!, ¿kʼusi van ta jpastik?». Pe xi la stakʼ li Eliseoe: «Mu xaxiʼ, yuʼun jaʼ epik li buchʼutik liʼ jchiʼuktike jaʼ muʼyuk ep xchiʼiltakik li stukike». Vaʼun li Jeovae ta ora laj yakʼbe yil li yajtunel Eliseo ti joyobtabil li vitsetik ta jteklume, yuʼun oy kaʼetik xchiʼuk karetaetik ti tsanajtik skʼakʼale.

Kʼalal chbat tsakatuk xa ox yuʼun soltaroetik ta Siria li Eliseoe. Xi laj yalbe li Jeovae: «Jeova, avokoluk paso ta maʼsat li soltaroetik liʼe». Vaʼun, ta ora noʼox li soltaroetik ta Siriae mu xa snaʼik bu oyik akʼo me xilik to osil. Ta tsʼakale, xi laj yalbe soltaroetik li Eliseoe: «Chʼayemoxuk chkil, yuʼun  maʼuk liʼ li jteklum ti yakal chasaʼike. Batik, ta xkikʼoxuk batel yoʼ bu oy li vinik ti yakal chasaʼike». Jaʼ yuʼun li soltaroetike batik xchiʼuk li Eliseoe, vaʼun kʼotik ta Samaria ti bu nakal li ajvalil ta Israele.

Tsʼakal to laj yakʼik venta ti bu oyike pe mu xa kʼusi stakʼ spasik li soltaroetike, jaʼ yuʼun xi albat yuʼun ajvalil li Eliseoe: «¿Mi ta jmilik?». Yuʼun li jsiriaetike oy ox kʼusi chopol snopoj tspasbeik li Eliseoe. ¿Mi ta van spak skʼoplal li Eliseoe? Muʼyuk. Yuʼun kʼajomal xi la stakʼbe li ajvalil ta Israele: «Moʼoj, mu xamil, akʼbo noʼox sveʼelik, vaʼun akʼo batikuk». Jaʼ yuʼun li ajvalil ta Israele, la smeltsanbe lek sveʼelik li jsiriaetike, vaʼun ta tsʼakale la stak sutel ta snaik.