An Israel pirme gin-aatake ni Ben-hadad nga hadi han Sirya. Pero ha kada pag-aatake, ginpapahamangnoan ni propeta Eliseo an hadi han Israel salit nakakapalagiw hiya. Tungod hito, karuyag ni Ben-hadad nga dakpon hi Eliseo. Hinbaroan niya nga hi Eliseo nakadto ha syudad han Dotan, salit iya ginsugo an iya kasundalohan nga dakpon hi Eliseo.

An kasundalohan han Sirya kinadto ha Dotan ha gab-i. Pagkaaga, paggawas han surugoon ni Eliseo, nakita niya nga an syudad napapalibotan hin kasundalohan. Nahadlok hiya ngan ginuliat: ‘Eliseo, ano an aton bubuhaton?’ Hi Eliseo nagsiring: ‘Mas damu an aton kaupod kay ha ira.’ Hito nga takna, ginpahinabo ni Jehova nga makita han surugoon nga an kabukiran ha palibot han syudad puno hin kabayo ngan nagkakalayo nga mga karuwahe ha pakiggirra.

Han gindadakop na hi Eliseo han mga sundalo, nag-ampo hiya: ‘Jehova, alayon butaha hira.’ Tigda la, bisan kon nakakakita an mga sundalo, diri na hira maaram kon hain hira. Ginsidngan hira ni Eliseo: ‘Nahingadi kamo ha  sayop nga syudad. Sunod kamo ha akon, dadad-on ko kamo ha tawo nga iyo ginbibiling.’ Sumunod hira kan Eliseo ngadto ha Samaria, nga gin-uukyan han hadi han Israel.

Urhi na han hinbaroan han mga sundalo kon hain hira. An hadi han Israel nagpakiana kan Eliseo: ‘Papatayon ko ba hira?’ Gin-gamit ba ni Eliseo ini nga higayon basi makabulos ha mga nagplano ha iya hin maraot? Waray. Hiya nagsiring: ‘Ayaw hira pataya. Pakaona hira ngan paulia.’ Salit ginpakaon hira han hadi hin damu nga pagkaon, tapos ginpauli hira.