Tsy voly nanafiky Israely Beni-hadada panjakany Syria. Kanefa izy tsiary nahomby raha, fotony isaka izy hanafiky, efa volan̈iny Elisa paminan̈y amy panjakany Israely. Tihanambotro Elisa Beni-hadada. Hainy fa Elisa nipetraka ta Dotana, ke nalefany tan̈y maramila syrianin̈y aby io hangala izy.

Syrianin̈y aby io navy ta Dotana tao alin̈y. Koa fa nifoha maraindrain̈y piasany Elisa, izy nahita maramila syrianin̈y maro nan̈odidin̈y tanàna io. Navozo mare izy ke nandronton̈o: ‘A Elisa, ino raha hataontsika?’ Ho Elisa: ‘Hitanao, ny miaraka amintsika maromaro toizay ny miaraka amindro.’ Nataony Jehovah hitany piasany Elisa io fa feno sevaly ndreky kalesy motro iro bongo nan̈odidin̈y tanàna io.

Koa fa hanambotro Elisa Syrianin̈y aby io, izy nivavaka: ‘Jehovah, ataova gila iro.’ Iro tsy ten̈a gila marin̈y fa nanjary tsy haindro aia tany misy iro io. Elisa amy zay nivolan̈a tamindro: ‘Tsy ty tanàna  tokony handihananaro. Alo ambarako anaro tany misy olo tadiavinaro io.’ Iro nindesiny Elisa ta Samaria, nandeha tamy panjakany Israely tan̈y.

Tontohitry ndraiky iro Syrianin̈y aby io, fa iro efa tara. Panjakany Israely nivolan̈a taminy Elisa: ‘Akory, voneko iro?’ Elisa ma namaly faty iro Syrianin̈y aby io? Hoizy: ‘Aza vonen̈a iro, fa ameza hanin̈y, baka io iraha mody.’ Nan̈ano fety be tamindro panjaka, baka io nalefany nody iro.