Stale biaje bicaalú Ben-Hadad rey stiʼ Siria guidxi Israel. Peru cada biaje guizaaca ndiʼ nagueendaca ritidxi Eliseo rey stiʼ Israel para ganda gucaachilú. Ngue runi gudixhe ique Ben-Hadad guinaazeʼ Eliseo. Gúnnabe nuu Eliseo ndaaniʼ guidxi Dotán ne biseendabe ejércitu stibe para guinaazecaʼ Eliseo.

Maʼ huaxhinni yendá ca siriu que ndaaniʼ guidxi Dotán. Ora birá gueelaʼ sti dxi que, biiyaʼ hombre ni racané Eliseo que ti ejércitu naroʼbaʼ naguu leʼ guidubi guidxi que, guizáʼ bidxibi ne bicaa ti ridxi: «Eliseo, ¿xi gúninu yanna yaʼ?». Para bicabi Eliseo laabe: «Jma stale tu nuuné laanu que cani nuuné laacabe». Óraque, biʼniʼ Jiobá guʼyaʼ hombre ni racané Eliseo que stale caballu ne carru de guerra naze bele lu ca dani nuu guidubi buelta guidxi que.

Ora gucalaʼdxiʼ ca soldadu siriu ninaazecaʼ Eliseo, biʼniʼ orarbe: «Jiobá, rinabaʼ lii, bisicheepaʼ lú ca hombre riʼ». Málasi bidxé lú ca soldadu que ne maʼ qué ñánnacaʼ paraa nuucaʼ. Óraque ná Eliseo rabi laacabe: «Cananítitu, cadi ndiʼ nga guidxi canayúbitu. Latananda naa, naa ziniáʼ  laatu ra nuu hombre ni canayúbitu ca». Yenanda ca hombre que Eliseo dede yendacaʼ Samaria. Raqué nabeza rey stiʼ Israel.

Óraque bidii ca siriu que cuenta paraa nuucaʼ, peru maʼ qué ñanda ñúnicaʼ gastiʼ. Gunabadiidxaʼ rey que Eliseo: «¿Zaa guuteʼ laacabe la?». Stale biaje gucalaʼdxiʼ ca siriu que ñuninacaʼ Eliseo, ¿ñee guníʼ ique Eliseo ngue nga oportunidad stiʼ para guquixe ni laacabe la? Coʼ. Gúdxibe rey que: «Cadi guutiluʼ laacabe, bidii ni gócabe ne bidii lugar chécabe». Óraque biʼniʼ rey riʼ ti guendaró para laacabe ne despué bidii lugar guibiguétacabe ra lídxicabe.