Yezebel ubino ku nyare moko ma nyinge Athalia, en de cwinye ubino rac ve cwiny min. I ng’eye, Athalia udoko dhaku p’ubimo mi Yuda. Kinde ma cware utho, wode ucaku nibimo. Kinde ma wode maeno de ugam utho, Athalia ukethere gire ni jabim mi Yuda. Etimo kero ninyotho thek mi ker cen, pieno eketho junego ng’atu moko ci ma romo doko jabim, kadok nyikwaye ma buu de kara en re m’edok ubimo. Dhanu ceke ubed ulwore.

Yehoiada ma Jalam ma dit giku Yehoceba ma dhaku pare ging’eyo nia gin ma Athalia ubetimo utie rac magwei. Giketho kwo migi i ariti pi nikanu nyakwar Athalia moko ma nok ma nyinge Yoac. Gigwoke i hekalu.

Kinde ma Yoac udoko ku oro abiro, Yehoiada ucoko dhu judongomawijo man Julawi ceke, e ewacu igi kumae: ‘Wukur dhugola ceke mir hekalu man kud wuwek ng’atu moko umondi.’ E Yehoiada uketho Yoac udoko ubimo mi Yuda man eroyo jamkermiwic i wie. Dhanu mi Yuda ukok kumae: ‘Ubimo kwo nja!’

Kinde m’Athalia m’ubimo ma dhaku uwinjo udul dhanu ubewoi i hekalu, eringo kuca. Saa m’eneno ubimo ma nyen, ekok kumae: ‘Wutimo gamba! Wutimo gamba!’ E judongomawijo gigam gimaku dhaku maeno ma cwinye rac, giwodhe woko man ginege. Jutimo ang’o pi nijigo lembe ma reco m’ebed ecwalu dhanu i ie?

Yehoiada uketho dhanu gitimo lembariba ku Yehova man ging’olo nia gibiworo Yehova kende. Yehoiada uketho dhanu rwombo pemblam pa Bal cen man girungo  ayi gin m’acwia ceke nziki nziki. Eketho julam ku Julawi gitim tic i hekalu kara dhanu ucak timo thier kendo ni Yehova i hekalu. Eketho jukur gikur dhugang’ kara dhanu m’ucido kud umondi i hekalu. I ng’eye, Yehoiada ku judongomawijo gitero Yoac i kal man gikethe iwi komker. Anyong’a unego dhanu mi Yuda lee dit. Calu ma dong’ Athalia ma dhaku ma cwinye rac umbe man jukabu thier pa Bal de cen, kawoni dong’ dhanu tie agonya nitimo ni Yehova. M’umbe jiji, ineno kite ma tegocwiny pa Yehoiada ukonyo ko dhanu dupa.