Adong ma boru ni si Izebel na margoar si Atalia. Jahat do ibana dos songon omakna. Kawin ma si Atalia tu raja ni Juda. Dung mate suamina, anakna ma na gabe raja. Alai dung mate anakna i, gabe si Atalia ma na mamarenta Juda. Alani i, dibunu ibana do ise pe na mangalo ibana, nang pe i sian keturunan ni raja termasuk ma pahompuna. Sude do halak mabiar tu ibana.

Diboto Sintua ni Malim Joiada dohot istrina si Joseba do mansai jahat na niulahon ni si Atalia i. Barani do nasida manabunihon pahompu ni si Atalia na margoar si Joas. Ditabunihon nasida ma i di bagas joro.

Tingki marumur pitu taon si Joas, dipapungu si Joiada ma angka kepala suku dohot halak Lepi. Didok ma tu nasida, ‘Jaga hamu pintu ni joro i, jala unang paloas manang ise pe masuk.’ Dibahen si Joiada ma si Joas gabe raja ni Juda jala dibahen ma mahkota tu uluna. Marsuraki ma halak Juda, didok ma, ‘Horas ma di raja i!’

Dibege si Atalia ma angka soara i jala naeng masuk ma ibana tu joro. Dung diida ibana adong raja na baru, marsurak ma ibana mandok, ‘Pengkhianat! Pengkhianat!’ Ditangkup angka kepala suku i ma ibana jala dipamate. Alai aha ma na masa tu angka ulaon na jahat na binahenna tu bangso i?

Diurupi si Joiada ma bangso i asa marjanji holan manomba Jahowa. Dihancurhon si Joiada ma sude patung dohot inganan manomba patung i. Dipillit ma malim dohot halak Lepi na laho karejo di joro. Dung i, boi ma muse nasida denggan  manomba Jahowa. Disuru ma dijaga gerbang ni joro i asa unang boi masuk halak na so mangoloi Debata. Dung i, diboan ma si Joas tu istana jala dibahen ma hundul di kursi ni raja. Marlas ni roha ma sude halak Juda. Ndang patung be na disomba nasida, alai Jahowa do na disomba. Malua ma nasida sian hajahaton ni si Atalia. Boi do diida ho songon dia habaranion ni si Joiada?