Be flɛ Zezabɛli i wa bla kun kɛ Atali. I klun yo wi kɛ i nin sa. I wun’n ti Zida famiɛn. Kɛ i wun wuli’n i wa kun yɛ ɔ yoli famiɛn-ɔn. Sanngɛ kɛ i wa’n wuli’n, i bɔbɔ sieli i wun famiɛn kekle nun. Kpɛkun be kwlaa nga ɔ wun kɛ be kwla kaci famiɛn’n, ɔ kunndɛli kɛ ɔ́ kún be. I anunman mun bɔbɔ’n ɔ kunnin be. Sran mun be kwlaa be sro i.

Ɲanmiɛn ɲrun jranfuɛ dan Zɛozada nin i yi Zoseba be wunnin kɛ like nga Atali su yo’n timan kpa kaan sa. I sɔ’n ti’n, be fali Atali i anunman kaan kun be fiali. Be flɛ ba sɔ’n kɛ Zɔasi. Be fɛ i ɔli Ɲanmiɛn i sua’n nun lɔ. Lɔ yɛ be tɛli i-ɔ.

Kɛ Zɔasi ɲannin afuɛ nso’n, Zɛozada flɛflɛli kpɛnngbɛn mun nin Levifuɛ mun, kpɛkun ɔ seli be kɛ: ‘Amun nian Ɲanmiɛn i sua’n i anuan’n su, nán maan sran fi wlu wa.’ I sin’n, Zɛozada sieli Zɔasi Zida famiɛn, kpɛkun ɔ fali famiɛn kle kun wlɛli i ti. Zidafuɛ mun be kpan seli kɛ: ‘Maan wie’n wla fi famiɛn’n!’

Kɛ Famiɛn bla Atali tili sran mun be nɛn’n, ɔ wanndili ndɛndɛ kpa ɔli Ɲanmiɛn sua’n nun lɔ. Kɛ ɔ wunnin kɛ b’a sie sran uflɛ famiɛn’n, ɔ kpan seli kɛ: ‘B’a cici min wun-o! B’a cici min wun-o!’ Kpɛnngbɛn mun be trɛli i. Be fɛ i ɔli be ko kunnin i. ?I sin’n, sa benin yɛ ɔ juli-ɔ?

Zɛozada ukali nvlefuɛ mun naan be nin Zoova be afiɛn sɛ ekun. Be seli kɛ Zoova kunngba cɛ yɛ bé sú i-ɔ. Zɛozada yoli maan be bubuli Baali i sua’n nin amuin mun. Ɔ seli Ɲanmiɛn ɲrun jranfuɛ mun nin Levifuɛ mun be kɛ be ko di junman Ɲanmiɛn i sua’n nun lɔ, naan nvlefuɛ mun be kwla su Ɲanmiɛn lɔ ekun. I sin’n, Zɛozada nin kpɛnngbɛn mun be fali Zɔasi be ɔli famiɛn sua’n nun lɔ, kpɛkun be sieli i famiɛn bia’n su. Zidafuɛ mun be klun jɔli kpa. Siɛn mɔ Atali klunwifuɛ’n nunman lɛ kun’n, mɔ kusu be sɔman Baali kun’n, nvlefuɛ mun be kwla su Zoova kpa. Kɛ Zɛozada yoli yakpafuɛ’n, i sɔ’n yoli nvlefuɛ mun be ye kpa. ?Nɛ́n i-ɔ?