Izebel nya inaikir, snori Atalia. Dakḇarḇor raris Izebel i. Atalia fyarḇuk kuker raja Yehuda. Fafisu swari imar mura, romawa ḇyedi ḇye raja fa fyadwer i. Ḇape rofyor Atalia romawa ḇyanya imar, Atalia iso ḇeḇepoik Yehuda. Ramnai, ḇyesewar fa myun pres raja kpu up ḇyesya kam. Inja, myun mansei monda, kpu ḇyedi kako ḇemarisen ḇefadwer i fa ḇepoik. Snonkaku syakam simkak faro i.

Imam Ḇeba Yehoyada ma swari, Yehosyeba, sufawi kaku roi ḇeḇarḇor Atalia ifrur ya. Sufawi na susmai roi ḇemun, ḇape suyokefbur Atalia kpu ḇyedi oso, isoine Yehoas fyor ḇyekapira kaker. Sumam faduru i ro bait.

Fafisu Yehoas ḇyeumur taun rifik, Yehoyada iryur ḇebukor sordade ma snonkaku Lewi syakam, mura ikofen ḇe si, ’Mkomamwarek kedwai bait. Snonkaku osoḇaberi pok fa isyun.’ Ramnai, Yehoyada ḇye Yehoas i fa ḇe raja Yehuda ma ryir wower ro bruri. Fyor snonkaku sya smam na, siryaḇ ma ssibras naba.

Ratu Atalia ryower mkaren snonkaku ansi ma fasaw beri rya ḇe bait. Ras myam raja ḇebabo ani, dar naba ḇo doḇe, ”Seḇembroḇ! Seḇembroḇ!” Ḇebukor ro sordade sya sfor ratu ḇeḇarḇor ani, sun i bur moḇ ya, ma smun i fa imar. Ḇape rariso kuker er ḇesmai awyae ḇeḇyeḇa ro Atalia ansi?

Yehoyada ifrur ḇaḇeasas rofandu er ansi ma Yahwe I. Sḇeasas fa sisyom ḇe Yahwe I monda. Yehoyada iwan si fa simkok amfyanir ma moḇ sḇukisyom  Baal na. Kyur imam ma snonkaku Lewi sya fa sfararur ro bait insama er ansine na seari ro diwa wer. Iwan ḇemamwarek kedwai fa smamwarek bait, insama snonkaku ḇemamas sya sisun awer. Ramnai Yehoyada ma ḇebukor ro sordade sya sun Yehoas ḇe istana ma iwan fa kyain ro karapesa. Snonkaku Yehuda syakam siryaḇ kaku. Sisyom ḇe Yahwe, simkei ro Atalia ma ḇaḇesamsyom faro Baal. Snar Yehoyada imkak ḇa, ine nun payamyum kaku faro snonkaku ḇebor sya.