Zezabel ti annan en fiy ki ti apel Atali ki ti move parey son manman. Atali ti’n marye avek lerwa Zida. Ler msye Atali ti mor, son garson ti vin lerwa. Me ler son garson ti mor, Atali ti pran pouvwar pardfors e konmans diriz Zida. Apre i ti sey touy tou dimoun ki ti dan fanmir rwayal. I ti touy nenport dimoun ki ti kapab pran son plas konman dirizan, enkli son bann pti zanfan. Tou dimoun ti per li.

Granpret Zeoyada ek son madanm Zeoseba ti konnen ki sa ki Atali ti pe fer ti vreman mal. Zot ti riske zot lavi e kasyet en pti zanfan Atali. Sa ti en pti baba ki apel Zeoas. Zot ti fer li grandi dan tanp.

Ler Zeoas ti annan set an, Zeoyada ti rasanble tou bann sef ek Levit e dir zot: ‘Vey laport tanp e pa les personn antre.’ Apre, Zeoyada ti fer Zeoas vin lerwa Zida e met en kouronn lo son latet. Bann dimoun Zida ti kriye: ‘Viv lerwa!’

Larenn Atali ti tann tapaz lafoul e tay kot tanp. Ler i ti vwar sa nouvo lerwa, i ti kriye: “Konplo! Konplo!” Bann sef tanp ti tyonbo sa move larenn e anmenn li pour touy li. Me ki i ti arive avek sa move lenfliyans ki sa larenn ti’n annan lo sa nasyon?

Zeoyada ti ed sa nasyon pour fer en lalyans avek Zeova kot zot ti promet pour ador zis Li tousel. Zeoyada ti detri tanp Baal e kraz sa bann zidol. I ti apwent bann pret ek Levit pour  travay kot tanp pour ki lepep i kapab ador Zeova laba ankor en fwa. I ti fer bann gardyen vey kot baro tanp pour anpes bann ki ti enpir antre. Apre, Zeoyada ek bann sef tanp ti anmenn Zeoas kot pale e met li lo tronn. Bann dimoun Zida ti vreman dan lazwa. Alafendefen zot ti kapab servi Zeova san lenfliyans Atali ek ladorasyon Baal. Ou remarke ki mannyer kouraz Zeoyada ti ed en kantite dimoun?