Jezebel ama enyene eyen emi ekekerede Athaliah; enye okonyụn̄ ọdiọk nte eka esie. Ebe esie akakara Judah. Ke ebe esie ama akakpa, eyen esie ama ada ukara. Edi ke eyen esie ama akakpa, enye ama emen Judah akara. Enye ama owot owo ekededi emi otode ufọkubọn̄ mbak owo ndomokiet idinyan̄a ukara ye enye; owot esịm nditọ nditọ esie. Kpukpru owo ẹkefefehe enye.

Jehoiada emi ekedide Akwa Oku ye Jehosheba an̄wan esie ẹma ẹdiọn̄ọ ke se Athaliah anamde ọdiọk etieti. Ntre mmọ ẹma ẹmen eyeyen Athaliah kiet emi ekekerede Jehoash ẹkedịp ke esịt ubet temple ẹbọk, kpa ye oro mmọ ẹkediọn̄ọde ke Athaliah ekeme ndiwot mmimọ.

Ke ini Jehoash ekesịmde isua itiaba, Jehoiada ama anam mbọn̄ Judah ye mme Levi ẹsop idem, onyụn̄ ọdọhọ mmọ ete: ‘Ẹkpeme kpukpru inuaotop temple, ẹkûyak owo ndomokiet odụk.’ Enye ama emek Jehoash edidem Judah onyụn̄ ayari enye anyanya ke ibuot. Mbon Judah ẹma ẹfiori ẹte: ‘Yak itọn̄ uwem ọsọn̄ edidem!’

Athaliah ọbọn̄ an̄wan ama ada okop nte ẹfioride n̄kpo onyụn̄ efehe aka temple. Ke ini enye okụtde obufa edidem oro, enye ama ofiori ete: “Odu! Odu!” Mbọn̄ ẹma ẹmụm enye ẹkewot. Edi nso kaban̄a ndiọi n̄kpọ oro enye akanamde mbon Judah ẹnam?

Jehoiada ama anam mbon Judah ẹn̄wọn̄ọ ke Jehovah ikpọn̄ ke mmimọ idikpono, onyụn̄ anam  mmọ ẹwụri temple Baal ẹnyụn̄ ẹbom mme abasi mmọ. Enye ama emek mme oku ye mme Levi ete ẹnam utom ke temple man mme owo ẹfiak ẹka ẹkekpono Jehovah do. Enye ama anam ẹkpeme inuaotop mbak owo ndomokiet emi mîsanake idibe idụk. Ekem enye ye mbọn̄ ẹma ẹmen Jehoash ẹka ufọk ubọn̄ ẹkedori ke ebekpo. Esịt ama enem mbon Judah etieti. Mmọ ẹma ẹkeme ndikpono Jehovah; mmọ ẹma ẹbọhọ Athaliah, ikonyụn̄ ikponoke Baal aba. Ndi omokụt nte uko Jehoiada akan̄wamde ediwak owo?