Yezebel yɛ biyoo ko ni yitsoŋ wa tamɔ lɛ pɛpɛɛpɛ. Atsɛɔ lɛ Atalia, ni ekɛ Yuda maŋtsɛ lɛ bote gbalashihilɛ mli. Be ni maŋtsɛ lɛ gbo lɛ, amɛbinuu baye maŋ lɛ nɔ. Shi be ni Atalia binuu lɛ gbo lɛ, lɛ diɛŋtsɛ ewó ehe Yuda maŋnyɛ. Kɛkɛ ni egbe mɛi fɛɛ ni esusuɔ akɛ amɛbaanyɛ amɛkɛ lɛ apele maŋtsɛyeli lɛ he lɛ. Egbe lɛ diɛŋtsɛ enabii po. Mɔ fɛɛ mɔ she lɛ gbeyei.

Osɔfonukpa Yehoiada kɛ eŋa Yehosheba na nibii gbohii ni Atalia feɔ lɛ. No hewɔ lɛ, amɛkɛ Atalia nabii lɛ ateŋ mɔ kome ni atsɛɔ lɛ Yoash lɛ yato. Amɛkwɛ lɛ yɛ sɔlemɔ shĩa lɛ. Eji amɔ amɛ kulɛ, abaagbe amɛ.

Be ni Yoash ye afii kpawo lɛ, Yehoiada bua asafoiatsɛmɛi lɛ kɛ Levibii lɛ fɛɛ anaa, ni ekɛɛ amɛ akɛ: ‘Nyɛdamɔa sɔlemɔ shĩa lɛ shinai lɛ anaa, ni nyɛkahãa mɔ ko mɔ ko baa sɔlemɔ shĩa lɛ mli.’ No sɛɛ lɛ, Yehoiada wó Yoash Yuda maŋtsɛ, ni ekɛ maŋtsɛ fai bu lɛ. Kɛkɛ ni Yudabii lɛ kɛ gbee ni wa bo amɛkɛɛ: ‘Maŋtsɛ yi aná wala!’

Maŋnyɛ Atalia nu bolɔmɔ lɛ ni esha foi kɛtee sɔlemɔ shĩa lɛ. Be ni ena maŋtsɛ hee lɛ, ebo akɛ: “Akpaŋ miyi nɔ! Akpaŋ miyi nɔ!” Asafoiatsɛmɛi lɛ mɔ lɛ. Amɛkɛ lɛ shi sɔlemɔ shĩa lɛ ni amɛyagbe lɛ. Shi te abaafee tɛŋŋ ahã maŋbii lɛ akpa amagajamɔ kɛ nibii gbohii krokomɛi ni Atalia hã amɛbɔi feemɔ lɛ?

Yehoiada ye ebua maŋbii lɛ ni amɛkɛ Yehowa kpaŋ kpaŋmɔ ko. Yɛ kpaŋmɔ lɛ mli lɛ, amɛwo Yehowa shi akɛ lɛ pɛ amɛbaajá. Yehoiada hã amɛkumɔ Baal sɔlemɔ shĩa lɛ ni amɛjwara amagai lɛ. Ehã osɔfoi lɛ kɛ  Levibii lɛ bɔi nitsumɔ yɛ Yehowa sɔlemɔ shĩa lɛ ekoŋŋ, koni mɛi lɛ abajá Yehowa yɛ jɛmɛ. Kɛfata he lɛ, ehã bulɔi damɔ sɔlemɔ shĩa lɛ shinai lɛ anaa, koni mɛi ni esaaa akɛ amɛboteɔ mli lɛ akabote mli. Kɛkɛ ni Yehoiada kɛ asafoiatsɛmɛi lɛ kɛ Yoash tee maŋtsɛ shĩa lɛ ni amɛkɛ lɛ yata maŋtsɛ sɛi lɛ nɔ. Yudabii lɛ amii shɛ amɛhe waa. Atalia yitsoŋwalɔ lɛ bɛ ní ekɛ Baal jamɔ baagba amɛnaa dɔŋŋ. Agbɛnɛ lɛ, amɛbaanyɛ amɛsɔmɔ Yehowa jogbaŋŋ. Ani oona bɔ ni Yehoiada ekãa lɛ ye ebua mɛi babaoo?