D Isebel het e Tochter, wo Athalja heisst und genau eso bös isch wie ihri Muetter. D Athalja isch mit em König vo Juda ghürate. Wo er stirbt, wird ihre Sohn König. Wo denn au ihre Sohn stirbt, versuecht d Athalja alli Chind und Grosschind vom König z töte und macht sich selber zu de Königin vo Juda. Si wett jede umbringe, wo a ihrer Stell chönnt König werde. Alli hend Angscht vor ihre.

De Hohe Prieschter Jehojada und sini Frau, d Jehoscheba, wüssed genau, dass das, wo d Athalja macht, sehr schlimm isch. Und drum verstecked si de Joas, eine vo de Grosschind vo de Athalja, au wenn si wege dem chönnted umbracht werde. De Joas isch no es Baby und wachst bi ihne im Tempel uf.

Wo de Joas sibni isch, rüeft de Jehojada alli Scheffe vo de Wächter und de Levite zäme. Er seit zu ihne: «Bewached alli Türe vom Tempel und lönd ja niemer ine.» De Jehojada leit denn em Joas d Chrone a und macht ihn zum König vo Juda. S Volk isch begeischteret und jublet ihm zue.

Wo d Königin Athalja de Lärm ghört, springt si zum Tempel. Dört gseht si de neu König und fangt a schreie: «Verschwörig! Verschwörig!» Da packed d Wächter di bösi Athalja, bringed si weg und töted si grad. D Königin het en sehr schlechte Iifluss ufs Volk gha. Wie isch es echt wiitergange?

De Jehojada hilft em Volk, en Bund mit Jehova z schliesse. Mit dem Bund verspricht s Volk, dass es nume no Jehova abetet. Drum riissed si de Tempel vom Baal ab und schlönd alli Götze i Tuusigi vo Stückli. De Jehojada organisiert d Arbeit vo de Levite und de Prieschter im Tempel eso, dass s Volk dört Jehova wider cha abete. Er stellt au Wächter bim Tor uf, demit niemer, wo unrein isch, i Tempel ine cha. De Jehojada und d Scheffe vo de Wächter bringed de Joas zum Palascht, demit er dört uf de Thron sitzt. S Volk vo Juda freut sich sehr. Jetzt sind si endlich di bösi Athalja und d Abetig vom Baal los. Alli beted jetzt nume no zu Jehova. Findsch es du nid au sehr muetig, dass de Jehojada eso vilne Mensche ghulfe het?