Eejatü wanee süchon Jezabel kanüliakat Atalía, mojulaasü maʼin shia maʼaka saaʼin tü shiikat. Kasaatsü Atalía nümaa chi aluwataakai saaʼu Judá. Outapa chi suʼwayuusekai, nia aluwataaka wanee süchon nüchikumüin. Outapa chi süchonkai, shia aikalaaka sünain aluwatawaa. Süka suluwataweein waneepia, suʼutireein naaʼin na nüchonniikana chi aluwataashikai otta chi eekai nuluwataweein süchikumüin. ¡Suʼuta aaʼinchii na süikeyuukana! Mmotsü maʼin wayuu seema.

Jehoiadá nünülia chi laülaashikai napüleerua na sacerdootekana otta Jehoseba sünülia nuʼwayuuse, natüjaa aaʼu mojuin maʼin tü saaʼinrakat Atalía. Mayaapejeʼe eein süpüla noʼutunuin aaʼin nünainjee wanee joʼuu sülüin Atalía, ayatüshi nounjuluin nia. Jehoás nünülia chi joʼuukai. Nepijain nia suluʼu tü aʼwaajüleekat Maleiwa.

Wanaa sümaa akaratshin nuuyase Jehoás, nuutkajeʼerüin Jehoiadá napüshuaʼa na laülaashiikana otta na leviitakana. «Eeja jaaʼin yala soʼuluʼu tü aʼwaajüleekat, nnojoishi jaralinjachin ekerotuin», nümakalaka namüin. Niʼitaaka Johoiadá wanee kotse saaʼu nikii Johoás süpüla niainjachin aluwataain saaʼu Judá. «¡Kojuta watuma chi aluwataaikai!», namakalaka na wayuukana sümaa emetuluin nanüiki.

Saapüin Atalía shiyorolo wayuu, suwataaka eemüin tü aʼwaajüleekat Maleiwa. «¡Kasakai wayuu tüü! ¡Eʼrüliikanache maʼin wayumüin!», sümaka sümaa emetuluin sünüiki. Ataʼünnüsü Atalía natuma na laülaashiikana, nalüʼüjain shia yalejeechiki jee noʼutaka saaʼin. Mojusü maʼin tü saaʼinrakat Atalía napüleerua na wayuukana. ¿Kaseetche alateetka mapa?

Nükaaliinjain Jehoiadá na wayuukana süpüla anajiraainjanain naya nümaa Jeʼwaa. Napansaajirüin nanüiki nümüin Jeʼwaa süpüla niainjachin neʼe naʼwaajüin. Nujuichijeʼerüin Jehoiadá tü aʼwaajüleekat Baal otta tü maleiwayaasükalüirua. Niʼitaain na sacerdootekana otta na  leviitakana süpüla naʼyataain suluʼu tü aʼwaajüleekat süpüla nuʼwaajünüinjachin Jeʼwaa. Jee müsia niʼitaain wayuu süpüla eejüinjatüin naaʼin soʼuluʼu tü aʼwaajüleekat suulia shikerojoʼoloin wayuu eekai eein neʼe. Eʼikajaanüshi Jehoás mapa eeinjachire nuluwataain otta aikaleʼennüshi saaʼu niinase chi aluwataaikai. Talatüshii maʼin na wayuukana soʼu tia süka eeinapain süpüla naʼyataain nümüin Jeʼwaa. Otta talatüshii naya süka nnojoluitpain Atalía sümaa shiʼrala wayumüin jee nnojoluichipain aʼwaajünüin Baal. Yalayala aaʼinchi Jehoiadá, ¿aashimüin? ¿Piyaawata aaʼu wattain naalii na wayuu nükaaliinjakana sutuma yalayalain naaʼin?