Yexenpee muaj ib tug ntxhais hu ua Athaliya uas limhiam ib yam li nws. Athaliya mus yuav cov Yuda tus vajntxwv. Thaum nws tus txiv tuag lawm, nws tus tub sawv ua vajntxwv. Tiamsis thaum nws tus tub tuag lawm, Athaliya txawm sawv kav cov Yuda. Athaliya muab cov noob vajntxwv tua pov tseg tibsi kom tu noob tag. Cov pejxeem sawvdaws ntshai nws heev.

Tus Pov Thawj Hlob Yehauyada thiab nws tus pojniam pom tias Athaliya phem kawg li. Nkawd thiaj ua siab tawv heev muab Athaliya tus tub xeeb ntxwv hu ua Yau-as coj mus zais. Nkawd tu nws hauv Vajtswv lub tuam tsev.

Thaum Yau-as muaj 7 xyoo, Yehauyada mus sau tag nrho cov thawj thiab cov Levi tuaj ua ke thiab hais rau lawv tias: ‘Zov lub qhov rooj ntawm lub tuam tsev, tsis txhob pub leejtwg nkag mus rau hauv.’ Yehauyada txawm tsa Yau-as ua vajntxwv thiab muab lub kaus mom vajntxwv rau nws ntoo. Cov Yuda qw nrov nrov tias: ‘Thov kom vajntxwv muaj txojsia nyob ntev!’

Poj Vaj Athaliya hnov suab qw nrov ntsoog qees ces nws txawm maj nroos mus rau ntawm lub tuam tsev. Thaum nws pom dheev tus vajntxwv tshiab, nws txawm qw tias: ‘Fav xeeb lawm, fav xeeb lawm lauj!’ Cov thawj thiaj ntsiab nkaus poj vaj thiab cab nws mus tua pov tseg. Tiamsis tseem tshuav tej kev phem uas nws tau haub ntxias cov pejxeem ne?

Yehauyada hais kom cov pejxeem cog lus ruaj khov rau Yehauvas thiab lees tias lawv yuav teev tiam Nws tib leeg xwb. Yehauyada kom lawv muab lub tsev dab Npa-as rhuav pov tseg thiab tsoo tej dab mlom kom tawg tag huvsi. Nws tsa cov pov thawj thiab cov  Levi los ua haujlwm hauv lub tuam tsev kom cov pejxeem thiaj rov teev tiam Yehauvas dua. Nws kuj tsa ib co neeg zov qhov rooj kom txhob muaj cov neeg tsis huv nkag rau hauv lub tuam tsev. Ces Yehauyada thiab cov thawj txawm coj Yau-as mus rau hauv vajntxwv lub tsev. Lawv muab nws zaum saum vajntxwv lub rooj zaum. Cov Yuda xyiv fab kawg li. Lawv rov tau teev tiam Yehauvas rau qhov Poj Vaj Athaliya tuag lawm, tsis muaj tus yuam lawv pe dab Npa-as lawm. Koj puas pom tias vim muaj Yehauyada ua siab tuab pab tau coob tus los pe hawm Yehauvas?