Jesebel bisi seiku anak indu ke benama Ataliah ti sama jai baka iya. Ataliah jadi enggau raja menua Judah. Lebuh laki iya mati, anak lelaki iya berengkah merintah. Tang lebuh anak lelaki iya mati, Ataliah milih diri empu nyadi pemerintah menua Judah. Udah nya iya nguji deka munuh sapa-sapa ke ulih nyadi raja, nyengkaum bala uchu lelaki iya empu. Semua orang takutka iya.

Imam Besai Jehoiada enggau bini iya, Jehoseba, nemu utai ke digaga Ataliah nya amat jai. Seduai iya berambunka nyawa ngelalaika seiku ari uchu Ataliah ke benama Joas. Seduai ngemesaika iya ba rumah sembiang.

Lebuh Joas beumur tujuh taun, Jehoiada ngempuruka bala pemesai enggau orang Lewi lalu madahka sida: ‘Jaga pintu rumah sembiang, lalu anang ngasuh sapa-sapa tama.’ Jehoiada lalu ngiri Joas nyadi raja menua Judah sereta ngengkahka makota ba pala iya. Orang Judah manjung: ‘Gayu-guru meh raja!’

Kuin Ataliah ninga munyi panjung lalu beguai ngagai rumah sembiang. Lebuh iya meda raja ti baru, iya nyerauh: “Penipu! Penipu!” Bala pemesai ngambi kuin ti jai nya, mai iya pansut ari rumah sembiang lalu munuh iya. Tang nama nyadi enggau pengawa jai iya ba menua nya?

Jehoiada nulung bansa Judah ngaga siti sempekat enggau Jehovah, iya nya semaya sida deka nyembah Jehovah aja. Jehoiada ngasuh sida ngeruntuhka rumah sembiang Baal lalu mechahka patung. Iya ngasuh bala imam enggau orang Lewi bekereja ba rumah sembiang ngambika rayat ulih nyembah  Jehovah ba dia baru. Iya ngasuh bala jejaga nyaga pintu rumah sembiang ngambika orang ke enda tuchi enda ulih tama. Udah nya Jehoiada enggau bala pemesai mai Joas ngagai istana lalu ngasuh iya duduk ba penuduk raja. Bansa Judah gaga ati. Sida ulih nyembah Jehovah, bibas ari Ataliah ti jai enggau sembah Baal. Kati nuan ulih meratika baka ni pemerani Jehoiada udah nulung mayuh orang?