Adda anak a babai ni Jezebel nga agnagan Athalia, a nakadakdakes a kas ken nanangna. Nayasawa ni Athalia iti ari ti Juda. Idi natay ti asawana, nagbalin nga ari ti anakna. Ngem idi natay ti anakna, pinagbalinna ti bagina kas agturay iti Juda. Tapno awan ti makaagaw iti turayna, pinadasna a patayen ti amin a posible nga agtawid iti turay, uray dagiti mismo nga appokona. Mabuteng ti amin kenkuana.

Ammo ti nangato a padi a ni Jehoiada ken ni Jehoseba nga asawana a nagdakes ti ar-aramiden ni Athalia. Uray no mabalin a pakatayanda, inlemmengda ti maysa kadagiti appoko ni Athalia, ti ubing a ni Jehoas. Pinadakkelda ti ubing iti templo.

Idi agtawenen ni Jehoas iti pito, inummong ni Jehoiada dagiti panguluen ken dagiti Levita ket imbagana kadakuada: ‘Guardiaanyo dagiti ruangan ti templo ket dikay agpaspastrek.’ Kalpasanna, pinagbalin ni Jehoiada ni Jehoas nga ari ti Juda ket kinoronaanna. Impukkaw dagiti umili ti Juda: ‘Agbiag ti ari!’

Nangngeg ni Reyna Athalia dagiti tattao ket nagdardaras a napan iti templo. Idi nakitana ti baro nga ari, impukkawna: ‘Traidor! Traidor!’ Tiniliw dagiti panguluen ti dakes a reyna, impanawda, sada pinatay. Ngem kasano a maikkat ti dakes nga impluensiana iti nasion?

Tinulongan ni Jehoiada dagiti tattao a mangaramid iti tulag ken Jehova. Iti dayta a tulag, inkarida a ni Jehova laeng ti dayawenda. Imbilin ni Jehoiada a dadaelenda ti templo ni Baal ken rumekenda dagiti imahen. Dinutokanna dagiti papadi ken dagiti Levita a mangaywan iti templo tapno makapagdayaw manen dagiti tattao  sadiay. Nangpili kadagiti parabantay iti ruangan ti templo tapno awan ti makastrek a narugit a tao. Kalpasanna, ni Jehoiada ken dagiti panguluen impanda ni Jehoas iti palasio ket pinagtugawda iti trono. Naragsakan dagiti umili ti Juda. Makapagserbida met laengen ken Jehova nga awanen ti impluensia ti dakes a reyna a ni Athalia ken ti panagdaydayaw ken Baal. Saan kadi nga adu a tattao ti natulongan gapu iti kinatured ni Jehoiada?